التجاوز إلى المحتوى
كلمات الشاعر
سيد منير عطيه
على ورق الروح …
…………………
للجرح كلام..
ما بيسمعهوش غير المجروح
للأهه كلام..
مكتوب ف كتاب ديما مفتوح
وانا ليّا سنين على ورق الروح
ب اكتب من دم الجرح حروف
وب اشوفها تنط قصاد العين
وتغطي دموعي زوايا الشوف
ممنوعه تبُص على العالم
إنما قدّامي أكيد مسموح
لملمت الورق المتعذب
وصنعت ف قلبي سفينة نوح
إنما كان دمعي طوفان أقوي
على ضعفي لقيته بيستقوى
ومسكني حدفني ف قاع البحر
وبرغم استغفاري الدايم
ما قابلتش حوت
ينجدني ويحدفني على البر
ما لقتش من الموت أي مفر
الظاهر ذنب الحب كبير
وانا قلبي العاشق عمرٌه ما تاب
الظاهر كان الهوي غلاب
أهرب من جرح ياخدني لجرح
الظاهر إن ليالي الشوق
حلفت ما تعدّي ويطلع صبح
ولقيتني خلاص أدمنت الحُزن
وصبحت بخاف جدا م الفرح
.وكأني ضحيه وخايفه العيد
ليهل وييجي ميعاد الدبح
كلمات الشاعر
سيد منير عطيه
