كلمات .. حمدى شاهين .
جيت أبيعك ياحنة
كترت الأحزان
والبخت لما يميل
البيت يسكنه الغربان
والدنيا تدى الخسيس
ويبات الأصيل جوعان
والزمن يتقلب حاله
والكبير فى المجالس يتهان
عجنتك بإيدى ياحنة
بماء الورد والزعفران
ومشيت أنادى وأقول
معايا حنة العرسان
قربى يازينة الصبايا
وخدى وقيتين بالميزان
قالتلى باب الهوا مقفول
محدش خبط من الشبان
والأحزان كترت علينا
مشفناش الأفراح من زمان
هتيجى الأفراح منين
والإنسان بيقتل الإنسان
والأخ يعادى أخوه
أصله كان فيه طمعان
والإبن عاق لوالديه
ودور المسنين بالأبهات مليان
والأخت ملهاش ميراث
لأنها هتديه لجوزها الغلبان
والظلم مالى البلد
والظالم عايش فى أمان
وتاجر الحقد والنميمة
فى سوق الزمن كسبان
قوم ياتاجر الحنة
وإقفل باب الدكان
وبارت بضاعتى أدامى
وطلعت أنا الخسران
أتارينى ببيع الحنة
فى سوق من الأحزان
كلمات .. حمدى شاهين
Discussion about this post