كلمات الشاعر 

وائل رشوان

جربي ….

لو مرة أنك تقرٍي 

لأواخر النَص 

قربي للنُص.. قربي أكتر 

علشان تقدري تقرٍي الشاعر من جرح إيديه 

علشان توصلي لخيال الوحي اللي بيوجع 

فوق طرف عنيه 

علشان حواليه اكتر من بنت فـ افكاره 

علشان البكر اللي فـ داره 

علشان الجنه اللي فـ ناره 

فيها ورق الشجر اللي بيسقط بحروف كلمات لاضمه مراره 

عماله بتضيق 

والوحي يدوس 

عماله بتضئ في العتمه فانوس 

كم المخاليق في الزحمه يغوص 

جوايا عجوز.. 

وبراح جواه عمال بيضيق

وانا لسه بَشُوش 

وبشاشتي بتنزف من جوه تجاعيد ، مـ الناس

عنقود العنب الجواني فوق سقف العمر 

طرح عناقيد ، إحساس ، إحساس 

فـ بقيت حساس   

وبقيت كناس 

وجنايني ساعات وادي وقت القطف اوانه طرح

غصني المكسور ملفوف لبلاب 

فوق عتب الباب 

والكسر فـ سطر النَص سرح 

نازل بيميل على شطر الميل 

ميلانه بـ كتف العمر شرح 

كَم الأوجاع اللي بتحدف من سطر ل سطر

قولتيلي زمان 

الدنيا بخير وانا صدقتٍك

وكتبت كتير عن حب الناس 

والناس بتحب من الظاهر 

قولت مظاهر… 

قولتيلي كداب.. 

والدنيا بتثبت في الباطن انها بتضيق 

عماله بـ تضيق…لسه بـ صَرخ 

عماله بـ تضيق 

والصرخه بتخرج من جوه بتهز الأرض 

الصرخه بتخرج وتسمع كل المخاليق

وتلطخ كل الصفحه سواد

بـ الطول والعرض 

قولتيلي إثبات 

قولت أنا برهان وانا خير دليل 

أسألي عن عين وسط الملايين 

شوفي كَم عياط البني أدمين وإضربي × 2 

اسألي بياعة المناديل 

كام دمعه بتنزل على غفله 

أسألي عن شاعر 

صاحي الليل قاعد يتكلم مع نفسُه

والوحي بيقبض على نَفسهُ

فـ يسيب النص بدون قافله 

كلمات الشاعر 

وائل رشوان

Wael Rshwan