التجاوز إلى المحتوى
كلمات الشاعر
ماهر أبو المعاطى
ف وسط الشِدة والكُربة
يبان وطنك من الغُربة
وتتنفس خريف عمرك
ف عز ربيعك الزاهى
وبتمصمص
شفايف همك البايش
تموت حُكماً
وبين الناس
تبان عايش
وتضحك رغم
أنف الحُزن
ودمع القلب
شايل مُزن
فتتصبر بأمثالك
ده ياما جِمالنا
ف الصحرا
بكلمة تنخ
فلو جالك
طوفان أهرب
ولا تسأل ف خلانك
ولا تِنجد ف يوم الأخ
عشان الجُبن يتأصل
وتبنى بيه أساس بيتك
وكاسات المذلة تدور
فتنسى كل تربيتك
ماخوفك أصله تربية
من ساعة ما خفت تحب
ف بنت جيرانك الحلوة
بقيت مرعوب
من الخِلوة
تخاف م الشيخ
ف كُتابك
تخاف م الدق
على بابك
تخاف رضعة
حليب امك
لحد الخط ف شنابك
ورغم الخوف
ضئيل جداً
مابين عينك وأهدابك
صبح خوفك وريد قلبك
تخاف لو مرة يوم سابك
………….
كلمات الشاعر
ماهر أبو المعاطى
