التجاوز إلى المحتوى
هنقعد خمسة …
…………………………….
كلمات الشاعر
حمدى موسى
هنقعد خمسة نتناقش ونتحاور
ونفتح للهوى مناور
نشوف الشعرا وصلت فين
نبص علي الكلام من فوق.
.وهننادى وهنشاور..علي المجانين
ومن جاور( السعيد )..جاور
وداق الشعر وملا العين
هنقعد خمسة وان لقيناها مرتاحة نزود حبة
قول عشرين …نقول تلاتين…
وان سخنت وحرارتها بقت عالية..
نخلى الخمسة دول خمسين
آدينا قاعدين
نجيب الشعر من شاعر منامه قليل
ندعبس عن مكان الشك والتنميل
ونعمل للكلام تحليل ….
نشوف قلبه ف عز الحب عامل ايه…..
نشوف ايه اللي تاعب الليل
وهل نقص الفرح أثر علي المعنى
وطعم الدم فيه لسعة….وهل فيه حاجة ف الشرايين ولو واسعة..الوجع من فين
وكم علبة سجاير بوكس يستخدمها فى قصيدة
وهل في علاقة بين الشعر والنيكوتين
هنقعد خمسة ونراجع مزاج الشعر
ونطبطب علي الكلمة… نسرَّح شَعر حرف يتيم
وندعى للعيال الخُضر
ونشوف اللي ف الفتارين
نحط الفتحة ع الشدة…ونرفع سعر لتر السين
سؤال لازم…بتكتب إيه وليه ولمين ؟
هنقعد خمسة ننسي الهم ننقل دم للضحكة
بدون مصاريف…ولا مليم
هدفنا نمنع الدوشة نقلل من غبار الجهل ونعطر سماء الشعر ..نعمل كمادات للود …
ونشوف حاجة تملا العين
وهنجامل..عشان نرفع روح الشاطرين
ولو كان فيه كلام حامل .وطش القرن..
هنسمية وندعى ربنا يخليه. نرش الملح من حواليه..وهنربيه علي حساب الأمل.. للدين
هنقعد خمسة .
.هنهزر وهنحزر وهنفزر..وهنقول كلمتين حلوين…
وبس خلاص
كلمات الشاعر
حمدى موسى
