التجاوز إلى المحتوى
(تعرف انا مين ؟؟)
كلمات الشاعرة
مروة أحمد طليس 🌹
درويش
وف ارض الله سارح
ولا مس الكره ف يوم قلبه
ولا يعرف بكرة من امبارح
أنا قيس تاهت منه ليالى
بيدور وسط بنات الحور
على ليلى ولساه بيعانى
أنا صورة وتاهت معانيها
حدوته جميلة ما كملتش
دارت المواويل تتحاكى بيها
أنا منى الصبر اشتكى غلبه
وسنين العمر اللى عاشونى
حالفين ما عليا هيتحسبوا
أنا روح مقسومه
ما بين حلمين
واحد فرحان
والتانى حزين
أنا حبة شخابيط مرسومه
على حيط بايش
وباعافر جوا حدود حلمى
مش عارف انا ميت أو عايش
تفاصيلى ف حلمى المرسومه
بقى فيها حاجات
مش مفهومه
ألوانها الزاهية
خلاص بهتت
والوردة اللى رويتها
بحبى
اوراقها الخضرة
معاه دبلت
وهى كات حدوته
مابين قلبين
مليانه عذاب وجراح وأنين
واتسرق العمر ف تفاصيلها
غاب فيها الحب بقاله سنين
تايهين بندور على روحنا
ملامحنا بقت مش ملامحنا
والفرح حزين
كلمات الشاعرة
مروة أحمد طليس 🌹
Marwaa Ahmed
