قبل العيد …

 كلمات الشاعر …

سعد الشرقاوى

قبل ما ييجي العيد بسلام

كنت مكوّع تحت التوتة

داير باحسب مطلوب كام

شوفت ديوني ماليا النوتة

فاجأة لقيتني باكلـّم روحي

وسامع صوتي بيكتم بوحي

وملك الموت وبرغم جروحي

جاي بيقول لي اختارلك موته

,,,,

وانا م الحسرة باشد ف شعري

واقول له صراحه انا كنت ناسيك

وفاكر انيّ هايطوال عمري

واضحك وافرح لمـّا الاقيك

مين هايسدّد عنيّ ديوني

واللا يقول للناس سامحوني

والليّ اتظلموا ساعة ما يجوني

سيبني شويّه الله يخليك

,,,,

قال لي انا زيّك عندي حساب

وما فيش حد بينفع حد

كل سؤال له الف جواب

وانت سؤالك مالهوش رد

ممكن تلقى الليّ يسدّوك

واللا عشان الموت سامحوك

والليّ اتظلموا خلاص منعوك

بين الجنة وبينك سد

,,,,

ايه الحل مع الليّ طلمته

ومات م الحسرة بيدعي عليك

يوم الحشر لو استسمحته

مش معقوله ها يسأل فيك؟

هوّ كمان مستني حسابك

علشان ياخد كل ثوابك

خدت شيطانك على طبطابك

لمّا حياتك لعبت بيك

,,,,

وانا باتندّم على احوالي

وما فيش اي طريقة تفيد

زاهد مالي وناسي عيالي

وطاقة نور في الظلمه بعيد

رغم التقل نطقها لساني

قولت يارب انا الليّ باعاني

ولقيت صوت الناس صحاني

بيكبّر لصلاة العيد

 كلمات الشاعر

سعد الشرقاوى