ألوم علي مين.. !

…….كلمات الشاعرة .. هيومة حمزة 

باكينام حمزة …

باشوف الناس بتتغير

وتتبدِل بناس تانيين ،،

وموقِف يجي والتاني

ويعكِس خُبثهم للعين ..

مانيش عارفه ألوم علي مين !

ومين فينا اللي فيه العيب..

كأنه من أمور الغيب

خُطوط الجُبن بتقرب

وبتقاوح بشكل عجيب ..

ألوم علي نفسي ، ولا ألوم

عباد الله في تراكيبها .

أبص لروحي طول اليوم

وأقول إيه اللي بيعيبها..

صاحبت قلوب علي عيبها ،

وقولت هاصلح المعيوب ،،

جازفت عشان أجملها

وأظبط للمحبه جُيوب ..

وسبت القلب بالبركة

بماء الحُب يتوضا ،،

ولبِست المشاعر ماس

ولا لبسِت في يوم فَضه ..

خانتني الدُنيا بالخَضه

وبالصَدمة فـى أصحابي

كل يُومين باشوف عَضه

ونَمّ عليا فـى غيابي ..

باداري الدَمع ، في كتابي

وأداري كتير من الهَذيان ،،

وأمد إيديا وأسامح

عشان مابحبش الخُذلان ..

أبص لروحي وعيوبي

واشيل الفطرة في جيوبي

آلاقي في الصحاب خاينين

وقلبي لأنه عاش إنسان

بينسي مهما بيعاني ،،

سقاني بطيبته م الأحزان ،

وأخاف يسقيني من تاني ..

أمنت بكل شيء جايز ،

أمنت بربنا المعبود ..

فيه ناس الخِسه جواها

وناس بالخير تملي تجود ….

كلمات الشاعرة

هيومة حمزة

باكينام حمزه