يا شاري الهم من قلب صاحبه ..
بقلم : سلمى صوفاناتي.
ظاهرة الست حشورة .. كل عمرها موجودة بحياتنا اليومية ..بحيث بتلاقي ناس همن الوحيد يعرفوا شو صاير معك ضمن بيتك او اسرتك ويحاولوا احيانا يجمعوا معلومات عن حياتك المهنية. . وقديش بتقبض .. ؟! الخ .. لانو ماشالله ويخز العين عنن .. حندق بندق العين يلي شافتهم وماصلت عالنبي تطق وتنبق. ظهرت عندن مواهب مكبوتة بالصحافة المرئية والورقية والمسموعة كمان .. ومالقوا يفرغوها الا بمحيطك الديق.. وضمن قوقعتك انت ياحبيبي .. مو مشان شي .. حتى تعرف قديشك حدا مهم بهاد المجتمع ..
حاصلو حبايب قلبي .. قبل فتره وصلت عالحي عائلة انتقلت من مكان معين .. لتسكن بالحي تبعنا .. والله لا كان جاب الغلا .. بالصدفة وانا رايحة لجيب ولادي من مدرستن .. واذ بصادف حرمة معها ولد وبنت وبين قوسين
( يااااا محاسن الصدف ) حاولت هالمرة تتقرب مني وبدها فرصه لتحاورني .. ومن المعروف عني .. اني مابحب اعطي وجه لاي،حدا بصادفو بالطريق .. ( حياتي وانا حرة فيها )حدا الو عندي شي ..؟!!! الحاصل له حبايب،قلبي .. عرضت عليي نصير اصدقاء
وناخد هالولاد ونروح عالجناين ومن هالحكي الفاضي .. وتصير تزورني وزورها .. وخير ان شالله .. من وين لوين لدخل حدا مابعرفه لبيتي .. مملكتي الخاصة .. اعتذرت منها بكل لباقة .. وقلتلها تشرفت بمعرفتك .. بس انا بشتغل بمجال بيتطلب مني كم من التركيز وكثرة الاطلاع .. وماعندي وقت لا للاستقبالات ولا لشرب القهوة .. ووقتي ببيتي من حق عائلتي فقط .. وانو كانت تستوعب
الخانم بتسمع وبتطنش .. ادن من طين وادن من عجين .. وعاقولة المتل : دفشني وشوف ما اجحشني .. حاصلو تشكلو اسي ياتاج راسي .. من يومين تصبحت بوجها لست بدور .. لحقني ابنها الفرتوك ونط ورايي متل القراده .. وبالحقيقة المدرسة الها بابين .. وانا متعوده جيب ولادي من طرف الادارة .. قلتلها عزيزتي بالاذن متعوده امشي من هاد المفرق
.. مالقيتها الا قرصت ابنها .. وشب بوجهي متل شيلا ولا طرزان .. وبايدو طابه عم ينططها ويركد وراها متل السعدان . ويقلي خالتو بدي امشي معك .. ياعيني ياروحي ارجاع عند امك الله يرضى عليك .. – لاء خالتو بدي امشي معك .. وبلش يركض بالطريق قدامي والحقه بسرعة حتى ماتدعسو سياره .. رغم اني كان ممكن اخسر كندرتي وانا عم الحقه .. لانو بصراحة لابسة كعب ( 16 ) هههه .. بس شو بدكم تقولوا عاجيل هالايام .. حاصلو وصل لباب المدرسه من جهة الاداره .. قلتلو عيني خليني وصلك لامك احسن ما ينشغل بالها عليك .. قلي مابدي .. وركد بسرعة البرق .. وانا صرخ عليه وبنفس الوقت بدي الحق جيب ولادي من دوامن .. اختفى الافندي من قدامي متل النمس .. تقولوا فص ملح وداب .. سحبت ولادي ومشيت بطريقي واذ بامو عم تسوح وتنوح .. وتدور عا ابنها ..
وتقلي بالطريق : وين رحتي بابني .. تعي دوري عليه معي مافي تروحي .. قلتلها اسالي عليه بالادارة مارح يروح بعيد .. مرقت القصة .. وتاني يوم .بالصدفة بسمعها عم تحكي مع مجموعة من النسوين عليي .. وبايدها ابنها شنتر حفانا .. رابطته بسلسله حتى ما يهرب منها .. متل ما بيربطوا الجرو الله يعزكم .. دخلت بيناتن وواجهتها هي وابنها وتواقحت عليي .. والولد الجئر يقلي انت ضيعتيني عن ماما .. تركتن ومشيت وبدني عم ينفض نفض .. وبالصدفة اليوم وانا عند البقال .. بسمع الولاد عم يحكوا عن المرة يلي اخدت الولد من امه من يومين وحاولت تخطفه بالمدرسة الفلانيه .. فورا انبحتت متل حبات البرغل المسوس .. وقمت عاليها واطيها
عا اساس انا مالي مكتفية بولادي ربي يسلمن .. وقاتلة حالي لاخطف مسترطرزان
من حضن امه .. ويا شاري الهم من قلب صاحبه … هههههههه .. نصيحة لكل ام ضبي ولادك وما تتركيهم عم يركدوا قدامك متل كلاب الشوارع .. وتتبلي عالخلق .. واللي،بايده .. الله،يزيده …
خلص الكلام ..
Discussion about this post