وحيد والدنيا ماسكاني

وحيد والدنيا ماسكاني من الإيد اللي توجعني
لا في صاحب جبر خاطري
ولا لقيت لي ف مره حبيب ..

سألت العمر يا عمري لفين واخدانا سِكتنا
جاوبني المُر سَكتنا
وعيشنا سنين على الفاضي ..

محدش يعرف القاضي
حكم على قلبي من كام عام
وإمتى الغربه تتقضى وأخرج م الوجود بسلام
لا عايز مال ولا عيله
وشيلت لوحدي انا الشيله
جروحي نايات وخلق الله بتعزفني
وصوتي خريف بيترجى الخطاوي تدوب ..

عليل بالصبر ع العشره .. وعالمكتوب
وياما رميت هنا زهري وانا مخبي عنيا الجوز
ولوّنت الحنين أبيض كما دموعي
ف توب أراجوز
لا مني إرتحت واتهديت
ولا سِكت الأنين فيا ..

رضيت بالهم يا قلبي ولم ترضى الهموم بيا .

كلمات الشاعر
محمود يحيى

Mahmoud Yehya