فركة كعب …

 كلمات الشاعر 

حمدى موسى

فركة كعب …

…………………………..

تيحي نعد اتنين تلاتة ومرة واحدة نقول سوا ؟

تيجي نشوف مين اللي يسبق ف الهوا 

بدل الكسوف مايهدنا. ؟

قبل الزمن ما يمد إيده ف عمرنا

إيه اللي يمنع إننا ندعو المشاعر للصلا ؟

احنا ف ساعة حب والشوق ف الخلا

والفجر طالع من عيونه بسملة

فرصة النهاردة اللمسة باتنين زيها

والنظرة هذا فصلها

والحب من رحم المني

والحضن واحد من بقية أهلها 

والبوسة فيه متقبلة

عينك ف عيني وركزي

وان كان ف صوتك مشكلة

 على ضل روحي اتعكزي

اتنين…… 

ياريتك تكسبي

قولي بسرعة هاموت ف إيدك والنبي

العمر صايم من اَدان الهجر وانتي مغربي

بلي لي ريقي بكلمتك وخدي اللي فاضل واشربي

اتنين ونص

 علي شفا روحي الحياة….. هانت قوي

العلم اثبت انه رسم القلب لازم يلتوي

 يطلع وينزل يحتوي 

            علي لهفة وشوية قلق 

علشان باحبك تبقي صالحة مؤمنة

 تنفع هنا وتنفع هنا

 لما تقوليها كأنها مخلوقة من قلبي انا

ورقم تلاتة….

الحسبة سهلة وممكنة

وهيحصل ايه لما تعادينا الأمكنة والأزمنة

وهيحصل ايه لما يلومونا بعضهم. أو كلهم

مادام قلوبنا محسنة ولا أى حاجة تهمنا

العمر فركة كعب دايرة مغلقة

ومفيش مكان جوانا إلا واشتكى

وتعب وأرهق حلمنا

وبيجرى أسرع مننا.

واحنا عبارة عن صور ف الألبومات

حتى الملامح عاوزه تفرح..بس خايفة م البكا

فياريت نحافظ ع الساعات

اصل الهوى لو قلبه مات…

هيلاقي فين اتنين حيارى زينا ؟!

 كلمات الشاعر 

حمدى موسى