من أقصي وجع في الروح
الي أقصي جروح الروح
كتبت قصيدة كات ناقصة
حروفها كلها عاجزة
وحبر سطورها ع الصفحه
صبح مسفوح
بدون همزة ولا لمزة ولا غمزة
ولا تظهر مع الغنة
ومش مكتوبة في السنه
ومنسية في حلق البوح
بتتكفي على كفوفها
وبتقاوم خروج الروح
ميلادها كان مع وجودك
عذبها كان في اخدودك
مع لعنة جدار الخوف
في ألوان السما السبعه
وخلوتها مع رابعة
وهي تناجي محبوبها
غسلت في توب طهارتها
صكوك غفرانك المحذوف
خرجت زمان من القصة
وشلت سطورك الفاجرة
وصاحبي كان بيوزنها
وبعد الوزن شكلها
فمات مقتول
وعاش عمره يفسرها
بدون مايخش أحلامها
يا آخر حد أولها
بدون مايبيع في أسرارها
واخر حد صبحنا و مسانا
و من أقصى المدينة
جاءت تحدثنا
عن الفيس اللي نجسنا
وقطع فينا لمتنا
ولسه يدوب هتنصحنا
على اخر ثلاث درجات
من السلم مكان الدم والعركة
فتح دفتر قصايدة المووڤ
عوج رجله على الشيزلونج
وكان لسه يادوب ساند بعكازه
ونص العرجة كان قادر عليها يحط
انا شوفته لكن بينط
بيشرب لسه سجاير فرط
وينفح في الندا دخان
فيتقل فيه جيوش احزان
في لحظه انسجام النور
مع ثورة حيطان نفسه
يلم في بعضة أجزائه يلملم
تاني في دراعة ويتحول رزاز مائي
يطير ويكب في دموعة
مابين وش السما والارض
بيشرب من ووشوش الناس
بقايا الشرد ويتعرى في عز البرد
-سجايره اتحولت طافية
حضني وخدني بالعافيه
يقصقص في ساعات الليل
عشان البرد مايعديش
على بكره اللي بيكحل
في أوجاعي
ويرسم ضحكة في عينها
وكان قاصدة يغميها
ولم أيده اللي مش مالكه
كومين من حلمها البايت
عبيد اتحرروا بدري
ماشفشي الموت
تواريخ احتلال الخوف
لأصلابهم
ولا تهجوا على إيده
طريقة انفصام الجرح
من الاوجاع كأنه اتباع
فضل ينزف أنين مذكوم
بدون مايشم احزانك
انا الدرويش اللي في قادر
اوشوش حتى في ودانك
ولا اقولك يامولانا
صلاة الخوف بتقبى في حالتي
كام ركعة وهل ينفع اكون مأمووم
و توبتي تجوز وانا لسه مابين ايدك
واقف منبوز
وهل ينفع اكون صايم ومتعلق
في شرياني حقن جلوكوز
وهل ينفع أشيل أحمال
وانا بارك مع جملي
ونايم في الخلا مهزوم
ياشيخنا فسر المكتوب
على التليفون
انا لسه ماجبتش جون
لكن جالي اتصال حالي
اكون ضيفك واقول موال
وامثل فجأتي الواوووو
ولحظة عيني ماتشوفك
واكون مصدوم
رهان خسران ماهش كسبان
ماتلعبشي على صمودي
مافيش مكسب مع وجودي
أنا الحزن اللي مش بعدين
ومش دلوقت أو بالليل
انا حزني مهش بالوقت
وخدني معاه أشوف النور
وأشوف الشاعر الطيب
من المجنون
لقيت اسمي ماهش في الرول
وباب الجنه كان مقفول
وقفت هناك على الاعراف
واول مرة اشوف احلام
بدون حتى ماروح في النوم
كلمات الشاعر
وحيد علي الجمال
Discussion about this post