للنور  شبابيك

من فرط العتمة اتخنق النور

والدنيا تدور من آخر حلم

وأول طلة على البدايات

العشق مداين

سلمها الخوف للمتاهات

مخطوفة وتايهة ومندورة الروح للأنات

وأنا قلبي نايات..

بتئن عشان رافضة تغني..

غير ليك بالذات

الأرض بتوسع في المسافات

والسما بغيامها بتبدر عتمة

وتخنق في وميض النجمات

أنا إيه خلاني أخط الوجع الساكن

جوه عنيك حكايات؟!

لمستني أماني الحب معاك

نسجتني اللهفة شيلان للعشق

بتدفي الروح من برد الليل

ولقيت القلب غيطان مواويل

بس الموال موصول بآهات

من إمتى بحبك!!.. مش فاكرة

كل القوانين المسموحة..

وبكل دروسها المتذاكرة..

مش قادرة تفسر حلم هواك

ازرعني نخيل وارويني بنيل

واحصدني جناين جوه عنيك

للنور شبابيك…..

إفتحها وخلي القلب شريك

الروح ترتاح لو حضنك بيت

ماقدرتش أبداً أكون غير ليك

كلمات الشاعرة

علا بركات محمد