تاج راسي
تاج راسي
______
أنا قطنك وانا صوفك
وأنا الحنة اللى فى كفوفك
وأنا اللى كل ما باشوفك
تاخدنى الفرحة بالاحضان
صباحك شوق وحنّيّة
ياأجمل صبح فى عينيه
يا روح الروح يا بهيه
يا واقفة للأمل عنوان
وانا حبك وعنوانك
واضحى العمر علشانك
وانا وردك وبستانك
يا اجمل ورده فى البستان
حبيبتى وأمى ومصيري
ولو كان منّى تقصيري
فأنا الملكى وانا الميري
ومطرقتك وانا السندان
أنا قمحك وانا فاسك
وانا جنودك وحُرّاسك
وانا فى الدرب نبراسك
يا نهرى والزمن عطشان
يا ذادى ويّا ذوّادى
يا روح جدى وأولادى
يا أغلى دُرّه يا بلادى
ذكرها الرب فى القران
فى حضنك حبى وحنانى
مليش غيرك حبيب تانى
ونيلك هو شريانى
يا اجمل نبضه فى الشريان
أنا أمنك وأنا خوفك
وأنا العين اللى بتشوفك
وأنا العايش على ظروفك
وانا الصورة اللى بالألوان
على نيلك اغنيلك
وأقيد بالحب قناديلك
ولو ع البعد أنا اجيلك
وبس تشاورى اكون رهوان
رسمتك قلب بات صاحى
على حبى،على جراحى
رسمتك نسر فى وشاحى
وتاج راسى فى كل مكان
كلمات الشاعر
عبد الرحيم على
Abdelrahimaly
