نسيت انساك
………..
بعادك طال ليالي طوال
وانا وحدي بفكر فيك
وأسأل نفسي لما تغيب
هترجعلي
ولما القاك غيابك طال
اراجع نفسي في التفكير
واعاند روحي وارجعلك
واقول لو كنت يوم راضي
ومرة ف يوم تكون قاسي
هتبقى أعز من ناسي
ولو قالوا حبيبك باع
أبيع الدنيا علشانك
ولو جرَّحت أحساسي
كتبت الشعر من أجلك
ولجل عنيك وعطر أيديك
يا أجمل خمرة تسكرني
وبتميِّل على كاسي
ومهما كتبت تفعيلة
وفيها م الكلام حيلة
بقول والله ما وفيتك
لأنك أهلي والعيلة
فشعري ليك هدية عيد
يا أجمل عيد سكن قلبي
اناجي في المسا طيفك
واكون ورداية في كفوفك
ودفاية في شتويتك
ونهر حنان في ليل صيفك
وبعد ده كله تهجرني
وتزرع في الضلوع سيفك
تموتني وتحييني
وبعد م قلت قلبي فداك
ولا حبتش حد سواك
فقلت انسى
لقيت نفسي
نسيت انساك
كلمات الشاعرة
منى الفؤاد
Discussion about this post