كلمات الشاعرة 

هيومة حمزة

باكينام حمزه

محبتك هي الملاذ …

………………

قربت مِنُه … دُوبت فيه 

حسِيت بمعنى للحياة 

إشتقت أشُوفه كل يُوم 

وكإني فِعلاً مُدمِناه .. 

هو الوَحِيد ب ارتاح معاه 

 وقصاده بابدأ غِنوتي ،

وألاقيني ب أتمشي في هواه

وأضحَك وأفرق بسمتي..  

علشانُه بَس أنا هاختِرِع 

عالم جِديد م المُفردات 

أنا عايزة كِلمة تبهِرُه

وتِهز جِزع الأمنيات .. 

مُشتاقة أدُوق بمحبته

همس المشاعِر والجُنون 

بدأت أحَوِش لهفتي 

وأعملها ( كحل ) للعُيون ..

علمني أحبه وأندَهِش !

وأرتاح لِهمس الشُوق بجد 

علمني أشيله جُوا قلبي  

وعيني ماتبُصِش لحد .. 

ماعرفش ليه قايد أوي

جَمّر المَحبه كل يُوم ،،

زايد بشِدة شوقي ليه

وقلبي مش عارف يصُوم.. 

مش لاقية حد من الخصوم 

كاتب قصيده تهزني

تِوصِف مشاعري له بجد

مش لاقيه نَص يمسني 

ولا بَحر أوزن بيه كلامي ،،

قررت أنسى الشِعر جايز 

أقدر أعبر عن غرامي..

وبشكل عادي أصرخ ب ( أحب )

من غير قيود وبدون مجاز.. 

وأقوله قلبَك دُنيتي

ومحبتَك هي المَلاذ.. .!!

كلمات الشاعرة 

هيومة حمزة

باكينام حمزه