شئ مخيف …

……………

كلمات الشاعر 

سيد منير عطيه

ما كُنتش اعرف

ان المُدن ما تساعش حلمي

وان الطيور مهما تعلا

 مش ح توصل للمدي

وانا حلمي اول ما ابتدا

كان شئ بسيط

وان اصغر جزء فيَّا

مهما يكبر لِساه ضعيف

شئ مخيف انك تسافر بالزمن

وسط أكوام الرفات

السقا مات لمّا الورود

نامت ف احضان الخريف

شئ مخيف

ان اللي منك يجرحك

يكَّسَر اجمل ما فيك

وقت امّا عينه تلمحك 

او ف ضهرك يدفعك

لسكة هلاك

كل اللي فات

ما كانش غير حبة وجع

اتجمعوا

علي حجر بوابة السكّات 

كلمات الشاعر 

سيد منير عطيه