مايو 19, 2023التقليديوفرت فلوس ع الأد … الرئيسية رواد الشعر التقليدي وفرت فلوس ع الأد … كلمات الشاعرة منى الضويني وفرت فلوس ع الأد وزرعت في بدني تقاوي الفقد فاشتد العود ورزيت القلب بكلمة معلش بكرة الأيام هتفور قنديل لكن سهراية الجاي شغلتها الأنوار النايلون وانعجن العمر بناس مش مني وخرجت تمام… كان كل ما أفوت ع السوق أشتهي ألوان الفرح الخام حواديت الأيام الخضرا منبات الونس المتحشلي وإن غبت ألاقي نصيبي وقفلي طرحت تكعبتي ولا دقت حلاها ولا عمري لامس ضلتها محجوزة جوه صلابة روح مش مني كانت دايما وقفالي ع الواحدة عايزاني تمامها كانت مهما داريت كاشفة المستور عارفة المتكلفت تحت تيابي والجب المطمور جايبه أسراره من طلة كانت بعد صلاة العصر تاخد قهوتها وتشبك للسما أحوالها كانت بتغيب الفجر وبتشرق مع آخر تأويل للشمس توليفة بحر ونيل كانت تقطع كل حبالها الدايبة وتشد جديد كانت بتسيب قبل ما تتساب وبتسكت قبل ما تفرط آخر الحدوتة لجلن تفضل مشتاق وتطلع ميتينك وتسيبك تمشي لكن تفضل روحك متشعلقة بحديد كانت قبل العيد ضحكتها بتجيب العيد وبتفرط بهداوة تسالي الروح للكل ونيبها ديما متعان للي معدي جعان للحب أحوال… والشوق أحوال وأحوالي ياما وياكي أحوال الغربة كل ما بتمد أفر بعيد أخاف من شوفتك للعور المكشوف وأخاف حكاياتي العوجة تفوتني لحضنك وأخاف عينيك لما تتوعد من غير ولا كلمة وأخاف توبيخك لما أفوت تحزيمة الصبر مش شبهك … مش شبهك رغم عنيهم ولسانهم شبه أمك أنا ألين من زرع خضار مولود إمبارح وأضعف من تبسيمة عاجز جوا حيطان الخوف ياما معنديش صبرك ولا زهدك مجبورة وعايزة ياما أنا عاشقة زهوة الأيام وأنوار العشق الصادق والبراني وأكبر فعلي لما تضيق …أقفل أوضتي وأقول وحشاني معلش مش إنتي أنا … أنا وحشاني أنا نفسي أقابلني مش عاوزة أكون أنا شبهك خنقاني مش عاوزة الصبر ولا حمل أصول مش شبهي ولا تل كلام عن عيب وحرام أنا عاوزة أكوني مش شبهك خالص مش قادرة أشيل الولد لحد الآخر مش مالكة أتحمل جبر السكة وضن الأيام الزمن العايب كَل مني كتير خلاني شبه الكل بداري العري بكمي وأقول الجاي هيغطي السكة المشياها بتعفر طوب وأبواب الروح بنور إزي رح أكمل من غير ما أطرطش دم مش قلقانة عليكي.. ولا على غيرك كفيني بهمي وش الدنيا القباح مكشوف ع الكل حريم .. ورجال حتى قلوب الولد الخضرا شين الكل هشيم يتسرسب صر الريح دوران … أشباه … قطعان … بتعافر لجلن تفلت من رشق الحيط فتلف.. تدور تسكن في الشوط مطارحها وأنا ويا الكل بستنى ع الدكة الدور أنا ياما ع الدكة مستنية الدور كلمات الشاعرة منى الضويني المقالة السابقة يا پوي ع الطب وسنينه ... المقالة التالية لا بيتَ لي ...
