خدعنا الورد …

خدعنا الورد ،

……………..

كلمات الشاعرة

هيومة حمزة

باكينام حمزه

خدعنا الورد

وخبى بين إيدينا البَرد

وغَير فكرة الموضُوع

كلامه لينا كان موجُوع

ومتخربِش

بزِيف الحُب والأحباب

بكلمِة هَجر مـ الأصحاب ”

بنار القافية فـ الدواوين ..

طب أشكي لمين ؟

وكل حُروفي متخانه وشاربه

حِيرة العاشقين

تِعبت وحرفي بأمانه ملاه الحُزن واللايمين..

يبان في العين حاجات ياما

وأحاول أبان وأنا بضحك

ومهما الضحكة بتداري

هتظهر باهته… ما أنا إنسان

خدعني الحب ياما زمان

وأسأل نفسي ألف سؤال

بنعشق ليه ؟

مادام الخل بيجَرح ، وينسي

اللي أتفقنا عليه ،،

لادُوقنا الفرحَه من قلبُه

ولا نامِت عُيونا عليه

وليل ونهار كتير نسأل

عُيون الورد تجرح ليه ؟ ..

وليه تِطبع علي قلوبنا

عَذاب الحُب والعاشقين ؟

وليه الحُب فـ الأول

بيطرَح وردُه جُوا العين ؟

وليه راضين

نحِب الحُب رغم إنُه ساعات بياع

بنقبَل ليه نِعيش العُمر زِيف وخداع ؟

حُروفنا في النهايه مشاع

ومش عارفين

هانشكي لمين ..

جِراحنا أصبحِت واحدة

وواخده ملامِح التايهين ..

حاولنا نتكِتب سطرين بلون الفَرح والروقان ،،

حاولنا نِبان قُصاد منكم بقلب أبيض

ماهوش زعلان ..

خَدعنا الورد بالألوان

وفـ الأخِر طلع صَبار ،،

خَدعنا الشِعر ، وبحورُه

خدتنا بشدِة للتيار

بقينا نَص .. . !!

ليل ونهار بيحكي

أنينُه للقاريء ،،

قلوب مسكينه م الأخر

وإحساسها ماهوش فارق ..

كلمات الشاعرة

هيومة حمزة

باكينام حمزه