أشتوت …

كلمات الشاعر …سعد الشرقاوى

جنّ الغرام مسّني عيشتى بقت زيطه
حبسونى فوق السطوح وقزحت م الحيطه
دجّال وقاسْلى الأترْ قال ابنكم مهْووس
لهفْ من أمّي الفلوس وعملىّ تحويطه
,,,,,
هرانىي يومها البعيد م الضرب بالنبّوت
طلق علينا البخور ونده على ألأشتوت
وقال هاتوله العسل منقوع فى قشر البصل
ياتلحقوه بالعَجًلْ ياتكون نهايته الموت
,,,,,
سمعت أمىّ بتدعي ع اللىّ ظالمني
وتقول له إرقي الولد خايفه يضيع منيّ
رفع إيديه لاتنين وقال عايز ألفين
دا الجن بعد يومين راح ينتقم منيّ
,,,,,,
قالت ضفايري وخلخالي داعقلي طار
وخدْ حلقي ورسمالي وطفيّ النار
وحيات ولادك ياسيدنا الشيخ ماتسيـبني
أنا عايزه ابني ولو حكمت ح ابيع الدّار
,,,,,,
صعبت عليّه قوي ولقيتها محتارة
وتقول دا كان فهلوي ونبيه ياخسارة
حصْوه ف عين الحسّاد اللىّ افتروا ع الواد
يحْرم عليّه الزاد والعيشه فى الحارة
,,,,,,,,
قولتلها يامّه الغرام خيطـُه بلون توبي
نسّاني طعم المنام والحب مكتوبي
وحبايبي لمّا اكتمل شبكوه فى طرف الأمل
ومعلــّقينه ف عمل على قلب محبوبي
,,,,,,
دوايا عند الحبيب وغلبت أحايل فيه
سايق عليه النصيب بيـبخـّره ويرقيه
والقلب لمّا يميل يفضل تمليّ عليل
ويحب سهر الليل والفكر يلعب بيه
,,,,,,
سحرنى رمْش العين واللمس دوّبني
والورد فى الخدّين من حسْنه غلــّبني
يامكدّبين الخبر يشهد عليّه القمر
عذّبني طول السّهر والحب شيّـبني
,,,,,,,
لو كان حبيبى ينظــّم ضغط موّالي
يرفعلى درجة حرارة حبّنا الغالي
وبوصفةالعشـّاق اشرب عصيرأشواق
حاتلاقوا قلبي راق والصحّه راجعالي
,,,,,,,,
دايب فى حب الوطن بسْ الوطن باعني
سايبني انده عليه مش راضىي يسمعني
دانا ابنه برضه ياهوه وبأحارب اللىّ باعوه
لا رحمني لمّا باتوه ولاحضنه بيساعني
,,,,,,,,,
محتاج حجاب النبي يوم وقفته بعرفات
بالعربي والاجنبي منشور على الصفحات
خطبة وداعه اللىّ مضمونها حقوق الناس
فيها الأساس اللىّ بيصحيّ الضمير لوْ مات
,,,,,,,,