بيمشي بين تلابيبي
بيمشي بين تلابيبي
ويفرد طوله بالمخدع
بيوجع حته وجعاني
ويملا الغصن وبيخدع
وانا والله مابارضى
أرد غريب
ولا باقفل بيبان حتى
عشان مني يكون له نصيب
خبيث فعلا وداخلني
كأنه حبيب
وانا مش بايعه أحلامي
عشان اخد قرار بالموت
انا وحياتي متصالحين
لا عمري جنيت
ولا مرة لحد شكيت
وطول عمري مع المساكين
ويندهني اللي يحتاجني
اقوله آمين
وتظلمني الحياه فجأة
وتخدعني
تخليني
اعيد حساباتي م الاول
ودمعه عيني تسبقني
وتحرق رمش كان فتان
وكان ساكن عيون جارحة
ومش هاين عليه يتهان
يسيب غصب الجفون وينام
اكيد شكلي ح يتبدل
وشعري اكيد ح يتبهدل
ولا ح احزن ولا ح انهار
انا صامدة في وش النار
في احشائي اللي واخدة الجرعة
بالقنطار
ملامحي راح تدوب م الهم
وعيني مصاحبه تحليل دم
وجرعة قاسية مابترحم
تهد جبال
وتاخد لون خضار عمري
لهم عضال
ولون الورد يتحول
صفار باهت
واقول هانت
اجيب الصبر من ناعسة
واقول انسى
واعيد الحلم وارجع له
واقول نفسي
اسيب يأسي
ساعات باتمنى لو مرة
تعود الشجرة للماية
فترويها ابتساماتي
ورقصة طير لعصفورُه
في عش اللمة والأحلام
أنا حلمي أكون جِده
لاحفادي…. واداري مرار
عشان مصعبش ع الغالين
وليهم ابقي جمر ونار
كفاية إني من خوفي
بغطي الكرب بكسوفي
و بكفوفي
عشان وشي صبح بهتان
عشان تعبان
ده كان كالشمس لو يظهر
بيعلن للوجود اسرار
فهل ممكن يفوت الليل كما عابر
ويجي نهار؟!
سؤال دايما في جوف الغيب
وسبحانه عليم وحسيب
يجيب الداعي من قربه
يشيل الهم من كربه
يارب القدرة قويني
لغاية لحظة الراحة
ماتبقا ستار
يارب القدرة قويني
لغاية لحظة الراحة
ماتبقا ستار…!!
كلمات الشاعرة
هيومة حمزة
باكينام حمزه
رفعت للتصميم
