بقلم … باكينام حمزه
غرام مدبوح …
……………….
بتيجي ليه علي بالي ؟؟
مش إحنا خلاص !
بِعدنا وقولنا ياللا فراق ..
ساعات باشتاق .!
وقلبي باشوفه متشعبط
في حبل الود والأشواق ..
يجوز قلبك يكون زيي
علي جذع الحنين مقتول
يجوز وحشاك ، لكن ساكت
ومش عايز تبوح وتقول ..
غروب العشق مش ساهل
وعمر الذكريات ماتموت ..
مانيش ناسيه عنيك لما
قالت لي في يوم
باحبك موت ..
قرار البعد كان قاسي ، وصعب كإنه حرب وجيش
نهينا في اللي كان بينا
وفركشنا في لحظة طيش ..
فراقنا كان علي غفلة وشد ستاير الحرمان..
قبلنا ليه نكون قصة ومنسيه في ليل احزان
وسيره ومذكورة في كل لسان
حاجات ياما بتتسرسب تخليك تيجي علي بالي ،،
حاجات دائماً بتضعفني
وتِربك موقفي الحالي
تحرك ذكرى جوايا …وتقصد تستفز الروح
بتيجي ليه وأنا حرفي
بينزفني غرام مدبوح ..
ياطير مجروح علي بابي
كفايه ايام عتاب وخصام
تعالي إبدأ ، وأنا هاقبل ،
وهاعلن حبي ليك عـ العام ..
كلمات الشاعرة
هيومة حمزة
بقلم … باكينام حمزه
