وبسافر
وبسافر على نفس القضبان
باتكعبل على نفس الطوبة
و بانقي الفرحة المعطوبة
و اغزل من نفس التوب فستان
مانا آخر مرة عملته قميص
فصلت عيوني ف ببيونة
و قاسمتك أحلام مجنونة
وشوشت عيونك بالنني
وحكيت لك على نفس الأسرار
و هزارك دايما كان بايخ
دايما بتسيب النور قلقان
و توارب بابك ع الحواديت
بتعشم قلبي بطقم العيد
والجزمة اللي عليها فيونكة
ياااه ع الأيام لما تعاند مشاوير تعبانة من الفرقة
يااه ع الأحلام لما بتيجي على باب العمر ماهيش فارقه
أنا كنت حصان في سباق زايف
فكرتك ريح
فكرتك صبح بطبعه صريح
ماحسبتش يوم للبعد حساب
و لا كنت بادور ع الأسباب
مين اللي اتكلم أو ساكت
كان شكل الروح دايما باهت
ولأول مرة بنتباعد والليل نعسان!
من قصيدة ” كل الطرق حواديت ”
ديوان أول بشاير ربنا
كلمات الشاعرة
بسمة شعبان
