ترنيمة بحر …

بقلم الشاعرة … ناديه عبد المحسن 

درويش ولملم م الندى ضحكه 

فارد حكاوي العمر ع السكه 

وبيغني 

القلب لون الورد  

وكان بالود متحني 

بعطر عيونها يتوضي 

منقوش حبها فضه  

على جبينه 

درويش وعيونها عارفينه 

بيعلن للتراب إنه 

خرج منه 

راجع بيشكي أنينه  للعصافير  

أسير قلبه لأوراقه 

عيونه لروحها يشتاقو 

ف يتلاقوا غنا ومشاوير 

درويش وعاشق الخير  

يهيم سواح ف ألحانها 

كتب ع البحر عنوانها 

ومستني  

عمره صبح كان محني  

ولسه برضو بيغني 

يعدي خيالها ويشاور على روحه 

درويش بيداري ف جروحه 

من الغربه 

بتاخده حروفها ف طريقه 

تكون صحبه وتنهيده 

يخبي دموعه ف قصيده 

وطلة فجر 

ف بيسيب للوجع ريحه 

بتصبح عطر  

وضحكه مهما تتدارا  

تفوح بالسر

بقلم الشاعرة … ناديه عبد المحسن