التجاوز إلى المحتوى
كلمات الشاعرة
چيهان أحمد النجار
ساعة حيط …
===========
بلاش القلب
مش ناقص
ضغوط بالله
دا كله شقوق
ومش ناقص وجع
وحروق
وبين الآهة والآهة بتخرج آه
مش ناقص وخايف موت
مفيش ذكرى بتديلو أمل فى حياه
وكان عايش على الفطرة
وراسم لون جمال بكرة في لوحة حب وسعادة
نظيف القلب بزيادة
ككل قلوب بنات جيلي
يادوب هما دموع فايضة في منديلي
وطول ليلي
وكالعادة مفيش في الدنيا شيء مضمون
ولا سعادة ولا احسان
وكان….. ياما كان
مفيش صاحبة غير الوحدة
دا غير أربع حيطان ساكتين
وسقف بلمبة مكسورة
مالوش في الزينة والبلالين
وفيه برواز بلا صورة
وساعة حيط
وشيش بينادي ياحبيبتي
متستنيش لأنه مفيش ….غير القهرة
دي مكتوبة على جبينك…..
يابت…..يابت
الحزن بيزينك
بلاش احلام
معادشي في دنيتك أيام
يابت…. انسي
وعيشي ….
الباقي من عمرك ورا الأفكار
وعديها نهار بنهار
ولما الليل يطول حبة
كأنه هزار لكن ماسخ
وقولي خلاص ولمي القلب والإحساس
ولفيهم وحطيهم في درج الذكرى
تحت الراس
وقضيها حياة افلام
وشوفي قناة تكون كوميدي
تجيب الضحك بدموعه
عشان تعرف عنيكي تنام
“أربع عيال وقلب”
كلمات الشاعرة
چيهان أحمد النجار
