يونيو 13, 2023الحديث« عودة ميت » للشاعر سعد الشرقاوى … الرئيسية رواد الشعر الحديث « عودة ميت » للشاعر سعد الشرقاوى … عودة ميت … __________________ كلمات الشاعر سعد الشرقاوى فاجأة لقيت جزمتي م الكعب جات نصّين ورباطها عن زمّتي ما بقاش يجيب خرمين ولسانها لمّا اتقطع طلع الشراب برّه والعيشه مٍرّة وجيبي فيه يا دوب جنهين ,,, قولت اشتريلي مداس شاغل وسعره بسيط وان بان فى وسط الناس أقول دي حاجة الغيط ع الناصية واد جزمجي بيصلـّح المراكيب ماكنة خياطة وشكارة كلـّها كراكيب فيه جوز ملمّع ومتعلـّق على المسمار بسرعة خدت القرار يلزمني بالتقسيط ,,,, قام بصْ فيّا وقال طاب جزمتك مالها لفـّيت بكعبي شمال وقولت اسألها؟ قام قال بسيطة أنا ح الحمها بالكولـّه جامده وحرام تتركن دا انت بتـتسلـّه الكولـّه كانت فى ايده وشمّيت الريحة وبقيت سطيحة تقولش دبيحة فى الحلـّة ,,, الدنيا باينه طشاش والآخرة قدّامي ولمحت شوقي اللي كان جار عبده برهامي ميّت بقاله سنين يارب ايه جابٌه والقبر غار في الطين وعرف منين بابٌه شاور عليّا وسألني عن ولاد إبنه ومراته مع طفلها ساعة ما مات سابه ,,, عيال عياله قالوله جاي تعمل ايه؟ آخرك صيوان العزا وتوزّعت يا بيه ما عادش لك عندنا في التركة شبر سليم خدنا الميراث كلنا ولا سيبنا حق يتيم جاي بسلامتك تعكنن ع اللي عاش بعدك والناس في بُعدك ما بتسامح ولا ف مليم ,,, اوعاك تفكـّر تهوّب مرّه يم البيت غير لمّا تلقى الحدادي تفرّق الكتاكيت ولقيتني باجري عليه واقول له عيب اتلم اقفل عليك تربتك واهجع بقى يا عم لو أيْ واحد وريث شافك مانيش مسئول ع القبر روح على طول وخلليّ عندك دم ,,, وفاجأة راح مندفع وقال اروح على فين انا يا ابني فاهم قوي بس انتوا مش عارفين تتعاركوا ليه ع المراث ومين ح يورث مين؟ طاب كام طلاق كلـّكم راح تسكنوا فى الطين ردّيت يا شوقي اختشي دا الحق مش بحلقة مرتك بموتك حرام والدنيا مش سفلقه انت الليّ رايق وربك تاب عليك م الشقا طاب قول يا فالح بقى نويت تطلـّق مين؟ ,,, لقيته قال يا حويط انا نفسي وخداني انا عمري ما ابقي عبيط وارجع لكم تاني دنيا غريبة وبشر يحسبها دايماله فاكر فى يوم القدر راح ينفعه ماله لا كان لازمني صوان ولا تربة مصبوبة ولا لمّة النسوان فى فراشة منصوبه بقالي خمسين سنة تحت التراب مرتاح وانتوا ف صراعكم هنا عايشين فى غيبوبة ,,,, وبدأت أصحى وأفوق ودماغي كان دافي ولقيت لسانه تقيل وجبال على كتافي وكلام يهد الحيل موزون بكيل وافي الخير يا ولدى كتير لكنـّه مش كافي ويفيد بإيه الخير والقلب مش صافي خليك فى نومتك وشيل حملك على راسك صلـّح مداسك وسلـّملى على ناسك واعمل حسابك تجينا ف آخرتك حافي كلمات الشاعر سعد الشرقاوى المقالة السابقة موعد فراق ... المقالة التالية وزير الزراعة يتابع مشروعات هيئة التعمير والتنمية الزراعية ...
