سر سكوتك،،للشاعر سلامه أبو النجاه
،،للشاعر سلامه أبو النجاه
سر سكوتك مخنوق داخل نبرة صوتك
وانت بتكتم قولة أي وانت بتعمل نفسك حي
وانت بتشحت لقمة قوتك
سر سكوتك سر دفين
سايل زي دموع العين وانت رصيدك مليون دين
وانت وجودك يشبه موتك
سر سكوتك له وشين
تاجر دم وتاجر دين وانت نزيفك في الميادين
نهر بيعزف لحن خلودك
سر سكوتك دمه رخيص
كر وفر وعمر فطيس وانت ف كار الغدر حديث
مخلوق داخل لغز صمودك
سر سكوتك فيض كوابيس
عهر وفجر وشغل ابليس وانت الواقف في الكواليس
تبكي وتندب طرح وجودك
سر سكوتك شبح الشام
قتل وسحل وزرع ألغام وانت بتسجد على أنغام
أم بتندب شاب ف عودك
سر سكوتك نار بغداد
دبح وحرق وسلخ عباد وانت بتنشد لحن بلاد
لسه بترسم خط حدودك
سر سكوتك شرق وغرب
هبوا وشنوا عليك الحرب وانت بطولك وسط الدرب
مدفون داخل قبر قيودك
سر سكوتك ثورة شك
دكت اركان قلبك دك وانت قيودك ما بتنفك
محبوس حتى ف دمع خدودك
سر سكوتك نهضة سد
سدت شريان قلبك سد وانت جروحك ما بتنسد
مطعون حتى ف عز سجودك
سر سكوتك هم وغم
جرح بينزف ما بيتلم وخلق ببروي عطشها الدم
وخلق بتعزف لحن سقوطك
سر سكوتك فقر وقهر
كسرة نفس وكسرة ضهر وانت بتزرع طول الدهر
تيجي الموجه وتحصد عودك
سر سكوتك
واقف خلف طابور العيش
عايش خايف م الخفافيش
وبيستنى الدور ما يجيش
وبيتمنى القطر يفوتك
سر سكوتك
قبض الشيك
ركب الموجه وقال يا فكيك
وانت يا لوعة قلبي عليك
لساك كاتم سر سكوتك
فضفض مره وقولها صريحه
إن الصوره يا صاحبي قبيحه
إن قلوبنا وهي بتنبض
لسه بتنبض نبضه جريحه
إن جروحنا وهي بتنفض
لسه بتنفض عار وفضيحه
إن أحلامنا وهي بترفض
رافضه المشي بخطوه كسيحه
إن الطبخه اللي طبختوها
نفس النكهه
ونفس الربحه
…………………………………
سر سكوتك
للشاعر سلامه أبو النجاه
Discussion about this post