كنز كبير

………

كلمات الشاعر 

سيد منير عطيه

إكتمال الحب معنى

إنهيار الحب موت

والأهات مش بس صوت

الأهات إحساس بيوجع

حتى لو تنهيد لصوره

جت من الذكرى البعيده

أو أهات أحاسيس وليده

أو أنين أحزان بترسم

كادر للصوره الجديده

إنما رغم المواجع

الأهات تعلن تمللي

إن لسّه القلب عايش

حتى لو دقّاته زايده

واللا ناقصه

كل حاله قُصادها قِصّه

إنهزام أو إنتصار

جنّه واللا حتى نار

برضه يعني القلب عايش

برضه حاسس

بس يفرق ف الحكايه

الطيور الواضحه عنده

تبقى غربان أو نوارس

قلبي يا محبوس وحابس

الأهات محتاجه تخرج

تجري ف الكون الفسيح

سيبها تطلع زي ماهي

قصر مرمر أو ضريح

سيبها بالمعنى الفصيح

تنتفض وتقول مشاعرك

يومها رح تعرف يا قلبي

مين معاك لحظة صراخك

مين كمان رح يبقى ضدّك

وان لقيت الكل باعك

عيش ولكن عيش لواحدك

وان لقيت إنسان يشاركك

يبقى إزرع كل زاويه

من زوايا العمر حُب

الأكيد ف ضلوعه قلب

إحضنه وحافظ عليه

حضنه يبقى أحلا جنّه

والنعيم يبقى ف عينيه

اللي قلبه يحس نبضك

وقت فرحك

وقت حزنك

وقت وجعك

يبقى كنز كبير وملكك

إرفعه ع العرش واعلن

إنُّه برضه بحبه مَلَكَك

يومها فعلا تلقى قلبك

طاقه من عزف الأغاني

وان دقّك شكل تاني

زي عصافير الجناين

سيبه يدخل فيك يعاين

صورته بين شرايين غرامك

يومها ح يبان انتصارك

وانهزام الحزن عندك

ضم إيده ف حضن كفّك

والأكيد وقت المشاعر

تكمل الصوره اللي ناقصه

كلمات الشاعر

سيد منير عطيه