رباعيات ضباب

شاعر الإحساس
رضاعبدالحميدحسن
ياشمس غايبه والقمر مخنـــــــوق
الشوق قتلني من بعدطول الشوق
ياسمرة ياللي هواكي حيـــــــــرني
طول عمري عاشقك بس مش معشوق
***
رسمت ليكي الجنــه في الأحلام
وعبــــــــــــــرت فيكي من آلام لآلام
اتاري الحلم ليكي بقـــــــــــى ممنوع
وحروفي ليكي مابتتسمعش كــــــلام
***
وباموت يوماتي بنفس اختناق الموت
وباصرح يوماتي وصرختــي بلا صوت
لا قـــادر في يوم اكون أيـــــــــــــوب
ولاحتى يونس جوه بطن الحــــــوت
***
وباغني ليكي رغم القلــــق والخـوف
ومن غنوتي نبض الأمـــــل محذوف
وياما غناوي دايـــــــــــره ع الفاضي
لابتداوي جرح ولاتسعــــف الملهوف
***
ولسه الضبــــــــاب ع الصوره بيعتـّم
وخلاص صبحت جبان م الجرأة متيتـّم
وكأني مدفون جـــوه قبر كبييييييير
والدنيا من زمان على خبري بتكتم
***
وبرضه ماشي والســـــــراب مفتوح
والكدب في العلالي والصدق مش مسموح
والدنيا فيها الصح متشقلب
وبابها على كل الغلط مفتـــــــــــــوح
***
ياروح مابعدك روح مـــوتي وارتاحي
وريحيني معاكي من حزني وجـراحي
الناس تنام الليـــــــــل وانا وحدي
مع الهموم والألم طـول المسا صاحي
***
سامحيني يانفس دانا مكســــــــــور
في دنيا ظالمه وضلمه مافيها طاقة نور
انا زي خيل ملجوم بيجري في مكانه
بر الأمان والمنى مانيش شايفله عبور
***
انا طير ضعيف من الريح هجـر عشه
اناالبريء اللي صوت الأمـل غشه
انا اللي تايه في البــلاد بلا مينا
انا اللي دمع السنين كسر سيوف رمشــه
***
يارب انت الأمل ومافيش أمــل غيرك
والدنيا دي كلها عايشــــه من خيرك
طبطب علينا بالعطف والرحمـــــــــه
واكسر صخور الظلام بلمسـه من نورك
•••