يامحطة العمر الأخيرة

كلمات الشاعرة
الأم لولو
يا محطة العمر الأخيرة
ثانيتين
هانزل هنا
الصبر زاد المجروحين
و الزاد نفد
من كام سنة
كل القلوب الطيبة
متعذّبة
تزرع سلام
تحصد أنين
تروي العطاشى بالحنين
يروها من نهر الضنا
و لحد إمتى مظلومين
صابرين سنين
و القلب من حِمله انحنى
شاري الرضا
من قلب باع حق الحياة
شاري الفرح
من كل عاشق نال مناه
شاري الأمل
من روح غريق كسب النجاة
شاري لعمري
فجر محروم من ضياه
شاري الدوا
لجريح و مش لاقي دواه
شاري انهاردة
و بكرة و امبارح معاه
شاري القرايب
و الحبايب
شاري صديق عن روحي تاه
شاري طريق
جواه طريق
جواه اتجاه
سهم انطلق
من جوا آه
و وصل لآه
شاري الحياة
بس الحياة
مش زي ما احنا مصدّقين
الموت حياة
و أنا جوا رحم الموت باعيش
و اوصل بحلمي لمنتهاه
و بانادي جوا الصمت
يا الله يا الله يا الله