كلمات الشاعر …حماده عركز
عارفه في غيابك
قلبي كأنه لسه عيل
وأمه سافرت يوم بعيد
………………………..
وأنتي عارفه
الفراق وقت السفر
بتكون سمانا مضلمة
مفيهاش نجوم
ولا شوق لنوم
ولا حتي بينور قمر
…………………………
لأنك قمر نور سمايا
وأنتي اللى عارفه قصتي
وأنتي اللي بيدك غصتي
وانتي اللى بيكي تبتدئ كل الحكاية
…………………………………..
فبلاش تغيبي
لأن قلبي كأنه طفل
بيجرحه مر العياط
دامفيش يا روحي اى نخله
بتعلي وتسيب السباط
…………………………….
ومفيش شجر أبدا هجر
طرحه وثماره
ومفيش يا عمري اي أم
تسيب ضناها يتحرق
وماتجري وطفيلة ناره
……………………………..
د الليل يا عمري مهما طال
لازم في لحظة ينتهي
والشمس بتنور نهاره
…………………………….
فبلاش تغيبي عني تاني
لأنك في قلبي بتعزفي كل الأغاني
وأنتي اللى قادرة تردي روحي
وقت مايضيق النفس
أنتي اللى قادرة ترسمي ليا الأماني
……………………………………….
أنتي اللى في عيونك دواء
وانتي اللى في إيدك نوي
لوتزرعية يطرح نخيل الحب عناقيد الهوى
……………………………………………
فبلاش بعاد
أنا قلبي قبلك كأنه كان منفي وعاد
وأنتي اللى كسرتي القيود
وأنتي اللى كاتبه في حبنا كل البنود
وانتي اللى بدلتي المحبه جوه مني
وأنتي اللى مني
خلقت فارس كسر اللوم والعناد
……………………………………..
أيوه يا ستي بعترف إني في هواكي لسه عيل
لو مرة تمشي وتسبيني
استدعي تفاصيل العياط والنهنهه
وكأنه عمري اللى ابتدأ فجأة أنتهي
من كتر بؤى متوجع م الصوت عليكي
اتخنف وأفضل اريل
بس وقت ما تحتاجيني يوم سند
أنا كتفي مش ممكن يميل
Discussion about this post