صديق الحلم

كلمات الشاعرة … الأم لولو
صباحك ماشي يتطوح
شارب كاس المرار ع الريق
بضحكة حزينة بيصبح
و فارش للأماني طريق
يعدي الوقت و يروح
و حلمه في إيده واخده صديق
يشده عشان يبات عنده
و حلمه يفر و يعانده
و يحلف بكرة هيقابله
في ساعة ضيق
و تحضن فرشته دمعه
يسبّح و الوجع سامعه
يسيبه ينام
و يتطوع عشان يطفي بقية شمعه
يفز يقوم
كابوس ملعون
رأى في النوم
ده حوت بلعه
طريق و ماشيه
في بحر التيه
و مغصوبة الخطاوي فيه
و خوفه يعوم
يشد إيديه
و يكسر مجدفه و قَلعه
و يوم ورا يوم
زمن عدى
و صبحت صاحبته الوحدة
و شاركت فرحته و وجعه
و يسند صبحه بالعكاز
و طقم سنانه متخلّع
و رد سلامه بقى إنجاز
و لا بينطق و لا يسمع
ينط العمر على كتفه
يميل اكتر
و يعرف إنه حان حتفه
فيستغفر
و تجاعيد الزمن تتشد
و تتعجّب بيكبر و لا ده بيصغر
و بسمة عريضة بين الخد
يخدها معاه لحد اللحد
ماهو عاشها برضا و سماح
أظنه ارتاح
و مش فارق غيابه لحد