الحلم لوح جرانيت …

كلمات الشاعر

 عمرو عامر

الحلم لوح جرانيت وقع

والبحر حابس مركبي …..و الرّيح

مش مستريح فى وحدتى بالوجع

بشبه كتير للطير وهوا جريح 

شاعر صحيح… لكن. شُعري انخدع

. أنا فرصة واحدة وجات فى وقت الغلط

أسفلت داسه كتير بدون رحمة

متفرفطه الحكايات كحبّة زلط

أنا عقد روحى انفرط من روحى فى الزّحمة

دايرة الدّواير من غموض ل غموض

والموتة اكبر من سقوط محدود

. أنا طلقة واخده فى وشها ورايحه

مع صوت حزانا ودمع طفل ضعيف

ودى بنت حلم مغمقه الطّرحة 

ودا صوت وجع مخنوق فى قلب نضيف 

. انا صورة لو مقلوبة تنزف دم 

من خنقتى م الحبل فى البرواز

ريحة القلق جوا الخشب تتشم 

كبخار عرق بينز جوا ازاز

. انا هسبق الموكب واكتب قصيدة موت

وهسيب حانات العربدة للمخدوعين

وأدي الشّيطان فوق رأسه بالنبوت 

واطلق غنايا بقوة عا الخاينين 

. الموت لوحده مهوش دليل لفراق

بس الفراق دا دليل لأوّل موت

الموت دوايا حتّى لو حراق 

والقلب ريشة وتايهه فى الملكوت.

كلمات الشاعر

 عمرو عامر