بقلم … توفيق بن محمد
و بڤلة ليها بيع الدنيا بلي فيها
أضحك يا ڤلبي زيد أزهى.. الدنيا ما تدوم لحد
و همومك في الصدر إكنزها.. لا توري للناس نكد
و حارب لوجاع و بارزها.. و كون جبل ال لا يتهد
و الضحكة ديما عززها.. و أرسمها وردة عل خد
و خيطها البسمة و أطرزها.. مهما لوجيعة تشتد
الفرحة عل وجه إركزها
و بينها من رابع جيهة و أضحك يا ڤلبي و عديها
أضحك ما تخبيش البسمة.. باش تڤعد ديما فرحان
و صورها على وجهي رسمة.. و زينها بأحلى ألوان
و كون ديما زاهي كي النجمة.. ديما للفرحة عنوان
و زيد كمل نحيها الحشمة.. ال مالكها على طول زمان
الريح حزين إعتبره نسمة.. و درڤ في صدرك لحزان
الضحكة من ربي نعمة
تره ڤولي علاش تحبيها تي أضحك يا ڤلبي و عديها
بقلم …..توفيق بن محمد ….صفاقس في20/06/2022
Discussion about this post