كلمات الشاعرة هيومة حمزة
……
منيش راهبة في محرابك
ولا واهبة لهواك الروح
ولا زي اللي يوم سابك
بتنسج من عذابها النوح
مانيش راكعة انا قصادك
ما بين التوهه و التسبيح
ولا شوقي لأيامك ….
ب اعيشه بقلب طب جريح
مانيش واهبه حياتي فداك
و لا ح امشي على الاشواك
ولا ح ابكي على غيابك
انا نسيتك و ناسيه هواك
مانيش عايشة الحنين لهواك
و لا ماشية ف طريق لقياك
و يبكي الليل مع دمعي
و تنزفني سمايا هلاك
مانيش خاضعة واسيرة روح
ولا مسكينه شوقها يفوح
تشوفني دمعة ف عيونك
وتكتبني ف كتاب مفتوح
مانيش مفتونة بيك أصلا
و لا رافضة عشانك نوم
ولا ح اسمح يفيض دمعي
وتبقي حياتي كم هموم
حياتي مش رهينة عليك
و لا ابدا ح أموت بعديك
ب اشوفك صفر ايامي
و ازيد الطرح لو آلاقيك
مانيش واقفة على أعتابك
ولا اتأثرت بغيابك
ولا نزلت دموعي سيول
بتجرفني لأبوابك
مانيش مضطرة اعيش قصة
بطلها في الخداع حريف
حكاية بايخه م الاخر
سطورها الكدب والتحريف
مانيش مضطرة أنا آسفة
أعيش في الوهم أبني صروح
و ب اتألم و أعيش حسرة
وتنزف روحي مني الروح
أخدت العهد أنا وقلبي
ح نقفل أي باب مفتوح
أنا باعلنها للعالم… و ب أتكلم بكل وضوح
مانيش عابدة في محرابك
و لا واهبة فداك الروح .!!
كلمات الشاعرة
هيومة حمزة
