مش بفهم فى السياسه ،،، بقلم نورا عواجه
بقلم نورا عواجه
طول عمرى مش بحب السياسه ، وبحمد ربنا إنى مش بفهم فيها حاجه . حتى لو كان ده بيحمل إتهام من الجميع أنى مُغيبه أو عايشه فى كوكب تانى . منكرش إنى لما بشوف إخواتى أو أى حد بيتكلم في السياسه ويتناقشوا وأنا مش فاهمه حاجة بحس أنى جاهلة سياسياً وحاجات كتير نقصانى . لكن أرجع وأقول كده أحسن ، السياسه ديماً فى نظرى تحتاج أجساد لاتحمل سوى العقول أما القلوب ليس لها مكان ، وده معناه أنى هدوس على قيم ومبادئ كتير أوى . وهرمى وراء ضهرى مشاعر إنسانية أهم عندى من أى حاجه فى الدنيا . لكن أنا عندى قناعه أن السياسه لها مفهوم تانى مختلف . مش بفهم منه غير أنى نفسي أعيش فى (وطن نضيف ) بكل ما تحمل الكلمة من معانى ، نضيف شكلاً وموضوعاً ، وطن راقى . وطن مفيهوش جعان ولا عريان ولا مريض ولا مظلوم ولا محتاج . وطن كل واحد فيه بينام بالليل وهو مرتاح ومش شايل هم بكره هيأكل ولاده منين ؟؟
وطن كل طفل فيه بيروح المدرسه وهو عنده مكان فى تختة نضيفة ومعاه سندوتشات زى زمايله ، وأستاذه بيشرح بكل ضمير ومش محتاج ياخد درس خصوصى . وطن كل شاب فيه عنده وظيفة مكفياه ومش محتاج يهاجر بطريقه غير شرعيه علشان يجيب فلوس . وعنده شقه يتجوز فيها حتى لو أوضه وصاله . المهم يعيش فى الحلال . وطن مفيهوش مريض هيفضل مستنى دوره فى مستشفى حكومى بالشهور علشان معندوش تمن العلاج ويموت ويندفن ولسه دوره مجاش ، وطن كل أب فيه قادر يجهز بنته بما يرضى الله من غير إسراف ولا تبذير ومن غير ما يكتب على نفسه شيكات ، وكل أم عايشه فى بيتها ملكه لا شايله هم حاجه ولا خايفه من بكره ، كل همها أكله حلوة لولادها وخروجه حلوة فى آخر الأسبوع حتى لو قعدوا على النجيله وأكلوا ترمس وفشار . وطن كل واحد فيه عارف حقوقه وواجباته . وطن آآمن . كل واحد فيه مطمن على نفسه وعلى ولاده . والأب مش خايف إبنه يروح الجيش يرجع فى صندوق . ولا يروح يصلى فى جامع أو كنيسه ميرجعش . وطن لما نركب فيه أى وسيلة للمواصلات نبقي مطمنين إننا مش هنغرق ولا نتحرق . وطن كل الشوارع فيه نظيفة مفيهاش ورقه مرمية على الأرض ، والعربيات ماشيه فى الشوارع من غير كلاكسات مزعجه مالهاش أى لازمه .. ولا دخان طالع من العربيات يكتم أنفاسنا . وطن ديمقراطى بجد كل واحد يقول رأيه ويعبر عن ال جواه بكل حريه بس بأدب . و لو حاجه مش عجباه يعمل مظاهرات بس سلميه من غير ما يضر حد ولا يخرب فى المصالح والمنشآت . وطن كلنا عايشين فيه بروح رياضيه بجد من غير تعصب أعمى ملهوش أى لازمه…وطن مفيهوش واسطه ولا محسوبيه ولاإبن الوزير وزير !! وأبن القاضى قاضى !!
وطن بيحضن المواهب والنوابغ ويستفيد منهم ويديهم حقهم بدال ما يضطروا يسافروا بره ، وطن المسيحى فيه زى المسلم بالظبط وأكتر شويه لأنه بإختصار(الدين لله والوطن للجميع) ومفيش حد هيتحاسب مع حد وطن كل مسؤول فيه عارف أن ربنا إداله أمانه فيتقى ربنا فينا وفيها ويحاول بكل قوته أنه يحقق أسباب العدل الذى كان ومازال وسيبقى هو غاية الجميع .العدل الحقيقى بكل ما يحمل من معانى ، العدل . الذى إن سألوك عنه فى بلاد المسلمين فقل لهم مات عمر !!
Discussion about this post