القايمه ولا الجهاز فى قضية الجواز ,بقلم نورا عواجه

القايمه ولا الجهاز فى قضية الجواز ,بقلم نورا عواجه 

بقلم نورا عواجه

التريند المتصدر منذ أيام
هو موضوع القايمه ال أتلغت من الزواج والعريس هيبقي هو المتكفل بكافة تجهيزات منزل الزوجية والعروسة هتروح بشنطة هدومها ،
أولا ً بالنسبة لغير المصريين اللي مش فاهمين معنى كلمة (القايمة) دا مُصطلح يُطلق على مستند ورقي بيتكتب فيه الحاجات اللي بيشتروها في فرش منزل الزوجية وبيمضي عليها الزوج والشهود كضمان لحق الزوجة لو لاقدر الله حصل إنفصال ،
بس القرار ده لسه ماصدرش رسميا ولو لاقدر الله أتطبق رسمى ، المفروض الراجل هو اللي هيتكفل بكل حاجة ،
طيب والست هتضمن حقها إزاي ؟!
هيعلو من قيمة المؤخر في حالة الطلاق لا سمح الله .
طبعا ده قرار فيه مؤيد ومعارض زى أى قرار جديد . بالرغم أنه موجود فعليا فى أغلب الدول العربيه وبعض محافظات مصر ،
وأنا حابه أقول كلمتين للشباب والبنات المقبلين على الزواج ، بالنسبه للبنات وأهلهم وال بيقولوا يشربو ويدوقو وفرحانين أوشمتانين ،
والله إنتو ما فاهمين عواقب الموضوع لو وقعتو مع حد لا عنده دين ولا ضمير . هيرميكي من البيت ويجيب مكانك واحدة تانية ولا هتاخدي منه حق ولا باطل ولو على المؤخر مش هيطلقك وهيسيبك كدا وياما حالات كتير معاهم قايمه بملايين والست لما حبت تنفصل إتنازلت عن كل حاجه بس علشان تنفد بجلدها ، لأن مش كل الرجاله أولاد أصول وبيفارق بالمعروف ،
الموضوع مش سهل على الطرفين وزى ماله مميزات
أهمها من وجهة نظرى أن الناس تتقي ربنا ويوم ماتجهز تجيب الضرورى بس وبلاش المظاهر الكدابه والاعداد المبالغ فيها جدا فى المفروشات وأطقم الحلل وغيره وغيره ، وكده هنجيب المطلوب بس ، وهنلاقي نفسنا تلقائيا بنلغى حاجات كتير ملهاش أى لازمه ، وكمان هنرحم آباء وأمهات كتير دخلوا السجن بسبب شيكات بدون رصيد علشان يجهزوا أولادهم ،
فهو كمان له عيوب كتير . وأهمها أن حالات الزنا والزواج العرفي هتزيد بشكل غير طبيعى لأنه فى الزمن ده وفى ظل غلو الأسعار ال إحنا عايشينه ومفيش حد قدر ينجى منه ، مفيش راجل هيقدر يأسس منزل زوجيه لوحده إلا لو كان (مستريح)
أو من ذوى الأملاك ودول طبعا محدودين ،
وبالنسبه للشباب اللي حاسه بالظلم وخايفين من الموضوع . ليكم رب أسمه الكريم وليك بدن تشتغل وتشقى وتعمل ال عليك بجد أومال الرجاله قوامون إزاى ؟! وصدقني هيبقى الوضع على ما هو عليه وأهل الزوجة هيساعدو بالى يقدروا عليه حتى لو موضوع القايمه ده أتطبق رسمى لأن فى ناس كتير محترمه ومش قصتهم أصلاً موضوع العفش والفرش والكلام ده ،
قضيتهم بجد إنك تكون راجل ويٌعتمد عليك وتحافظ على بنتهم ال بيأمنوك عليها وهيدعموك لو إنت راجل وتستاهل . وفى المقابل إنت لازم تكون راجل وتصون بنات الناس زي ما بتتمنى الناس تصون البنات اللي من دمك وعرضك ..
ياجماعه القايمة مجرد ورقة وفي لحظة بتضيع ، والعفش مهما كان غالي مُجرّد ماس كهربائي لا قدّر الله هيساويه بالأرض ، والدهب بيتشال في الدولاب ، أو بيتباع فى أول أزمه . والفرح الاسطورى أخره ساعتين تلاتة ويخلص ، كُل دي شكليات واللي باقي هو معدن الشخص اللي معاك ؛ اللين والموده والرحمة في المُعاملة هي اللي هتهوّن الدنيا ، والتفاهم والحنيّة هي اللي هتطبطب في الأيام الصعبة ، وولاد الأُصول هُما اللي هيصبرو على لحظات العُسر والضيقة . يعنى الخلاصه ،
الراجل الشاري لا بيفرق معاه قايمه ولا قاعده ،
والست لما بستغنى بتمشي وهى مش فارق معاها كنوز الدنيا لو أتحطت تحت رجليها ،

والله لا المهر ولا القايمة ولا الشبكة ليهُم أي لازمة جنب إن ربنا يجمعك بشخص يراعي ربنا فيك ويعوّضك خير ..
دوروا على السكن والمودة والرحمة وسيبوا الكلام الفارغ ده علشان ده بتاع الناس ال معندهمش أصل …