علاقة عبد الحليم حافظ وعبد الوهاب

عبد الحليم وهو طفل كان انطوائي ومكتئب دايما بسبب ظروف اليتم اللي مر بيها ولكن قال عبد الحليم إن اللي خرجه من الجو دا حاجتين القراءة وسماع الموسيقى ..
وطبعا كان يهوى عبد الحليم سماع عبد الوهاب ..

كبر عبد الحليم وهو متربي على أغانيه ومش بيسمع غيره لحد ما بقى عازف أوبوا في الفرقة الموسيقية ورا عبد الوهاب عبد الحليم قال إنه دايما كان بيتجنب إنه يروح يقوله إنه مطربه المفضل وإنه مش عارف دا ليه يمكن كان عشان ليه هيبة وهالة بتحاوطه .. المهم إن لما تقدم عبد الحليم في اختبارات للقبول كمطرب في الإذاعة كان محمد عبد الوهاب من لجنة التحكيم ووافق على عبد الحليم وخلى أغنية يا حلو يا أسمر تكون موجودة في الإذاعة وعجبته جدا وطلب إنه يقابل عبد الحليم وقابل عبد الحليم عبد الوهاب أول مرة في مكتبه وطلب عبد الوهاب من عبد الحليم إنه يغنيله أغنية وعبد الحليم غنى وعبد الوهاب بكى وقال إنه أول مرة يسمع حد بيغنيله بالإحساس وبالروح دي وفي نفس الوقت مش بيقلده ..
كان حصل خلاف بين عبد الوهاب وعبد الحليم في مرة بسبب عقد بينهم على أفلام لكن ساعتها الخلاف خلص بينهم ورجعوا أكتر من السمنة على عسل وكانت بينهم علاقة قوية كدا علاقة زي الأب والابن.. كان في مرة حوار بين عبد الحليم وعبد الوهاب كان عبد الحليم بيسأل عبد الوهاب لو عايز تاخد رأي حد في غنوة ليك أو تشوف أثرها عليه هيكون مين وساعتها عبد الوهاب قاله ” انت ” ..
عبد الوهاب كان عاشق لعبد الحليم..
السيدة فاتن حمامة بتقول عبد الوهاب دا غريب اوي لما عبد الحليم مات قفل على أوضته بالأيام واغم عليه ومجدي العمروسي صديق عبد الحليم قال إنه لما عبد الحليم مات والسيدة نهلة القدسي ( زوجة عبد الوهاب ) بلغت زوجها الخبر عبد الوهاب في ساعتها اغم عليها وفضل قافل على نفسه تلت أيام ولما خرج راح على بيت عبد الحليم ودخل أوضته وقعد يعيط فيها وكان كل الناس متفقين إن أثر الخبر على عبد الوهاب كان صعب جدا كإنه ابنه بالظبط .. مجدي العمروسي كان بيحكي إن مرة بعد ما عبد الحليم مات عبد الوهاب كلمه وهو بيسمع الويل الويل فراح عبد الوهاب قايل ” بص شوف المج*م بيقول ايه!! ” – عبد الوهاب قال كدا غضبا من إن عبد الحليم سابه وكإن هو اللي عمل كدا – ( طبعا دا من الصدمة والزعل ) …
عبد الحليم وعبد الوهاب كانوا بيمتلكوا أفضل علاقة بين ملحن ومطرب وبين معلم وتلميذ على الإطلاق
الحقيقة العلاقة ماكنتش علاقة ملحن ومطرب أبدا دي كانت علاقة أب وابن حقيقي
ربنا يرحمهم ويجعل مثواهم الجنة