عُقوق إضطراري

د.فاطمة جعفر
ضاقت الدايرة
وضاق بيها الهوا
والجِدار بينك وبين النور
بيَعْلى حَبَّة .. حَبَّة
وادِي نارَك
بطَّلِت تُرقُص خلاص
والرُّصاصة ..
فـ الْعمود العُمْري مَغْروسة
وجرحك مُش بيقْفِل
وانتَ ..
من عُمرك بتنزِف
بُكْرة ..
بُكْرة
وانتَ ..
بِتْمارس عُقوقَك
غَصب عنَّك .
بعد ما كنت فْـ إيديَّة
حقيقةَ نابْضة..
إبتديت القهقَرة لْدُنيا الخيال
مِن تاني راجع تِبْقى حلم ..؟!!
ضاقت الدايرة ..
ولسَّة الأسئلة جوَّايا فايْرة
لسَّة بِتْخَربِش ف أطلال الأمل
ممكن ..؟!
وإنتَ مُش فاضلَّك
غير مُحاولة بْمَحض ضِلَّك
تِوصِل الشُّوق بالطريق ..؟
ممكن ..ف يوم يتْلَم جرحك
وف عروقك
يجري بُكْره من جديد ..؟
ممكن بنبض جناح
تِرفرَف أو تِطير
وبْحرف واحد
يرْتوي صوتك هَديل ..؟
ممكن دا ولَّا ..
م
س
ت
ح
ي
ل ..؟

“الأُخرى”