وبين حَرجَك .. وبين جَرحَك : بقلم الشاعر وائل رشوان

وبين حَرجَك… وبين جَرحَك
يدوب نقطه ناقصها بواح
وبين نَفسك وبين نٍفسك يدوب ترتاح
وبين إنك كبرت خلاص و مش قادر !… وبتكابر..
وميت بس بتعافر
وبتفرق ع الجميع ضحكة
بـ قلب ملوش أهمية
وتكتم في الكلام لكن
بيتجمع ويلمع كله ف النني دموع ف عينيك

وعن إني
رافضني افوق من الغفله
والاقي العمر كان حفله
وكل حضوره ناس سافله
بترقص فالس من حواليه

وعن عمر ومليته عيوب
مشيت وياه بـ حَدف طوب
مافيش ولا طوبه جات صايبه
مافيش غير طوبه جات خايبه
وراشقه فـ وعدي والمكتوب

مشيت جوه…
مشيت فيها… مشيت.. لكن !
مفيش شبهي هناك ساكن
لا نفس الناس بلاقيها
ولا نفس المكان هو !!
هنا كل البشر تماثيل
هنا كل الكلام تمثيل
هنا الدنيا اللي رايده الميل
ورايده الضرب بـ القوه
وانا المسحول
وعايش فيها ك المقتول

بنادي وأقول
يا رب الكون بـ كون فـ يكون
مادد إيدي يا رب العون
أنا كُلي بقيت زاهد
يا رب الخلق يا شاهد
كرهت خلاص اكون زائد
وضرب وطرح للفاقد
تعبت ياريت تريحني
يا ربي وهو ده المضمون
: :
<img src="https://alrouwadnews.com/wp-content/uploads/2023/10/inbound4890957819140814218-300×267.jpg" alt="" width="300" height="267" class="alignnone size-medium wp-image-69380" /