و لو حلمة ليلة ..

بقلم الشاعرة ….منى البابوري

و يجرحوك
بالضحكة و التبسيمة
و يقولولك انت صاحب الدار
و باش تبقى معاهم ديما

و عاشروك و من طبعك عرفوك
ما اطيق في المذلة حتى كليمة
حسيت روحك في داركم
على يمينك باباك و على يسارك اللميمة

وعدوك يكملو الطريق معاك
و صبرت و تحملت لكن تبخرت وعودهم
و م القصعة ما نلت حتى لحيمة

لا طمعنا باللحمة و لا حتى بغليلة
حلمنا نعيشوا و لو حلمة ليلة
تكون البداية لقصة مراة عظيمة

و بدينا و كانت البداية محلاها
صرت بكلامي نحس بمشاعر الناس و مغزاها
و كيما هوما حسوا بي في كل كلمة نقراها
وصلت حروفي لقلبهم و تربعت مغلاها

يالندرا الي حكيته صح
و حروفي صدق ما وصلتهم
و الي توهمته في خيالي بح
صار حديث عادي و الايام في نستهم

يا حلمة ليلة صعب تكوني حقيقة
و زايد تكوني حلم من احلامي
نحسك كابوس نعيشه كل دقيقه
و صرتي وجع مكان ما تزهي ايامي

باش نغمض عيوني ع الي وعد و خذلني
لكن ما ننسى الوجع الي عيوني حساته
و كل وجع يعليني لفوق ما يقتلني
و لو الناس بعيونهم شافوني
حلمي وسط الكفن حاطاته

بقلم الشاعرة ….منى البابوري