ليس منا من بات شبعان وجاره جائع

بقلم … نورا عواجه

كلنا بنمر بأيام صعبة وتقيلة سواء مرض أو إبتلاء أو فقدان حد عزيز ،
بس الأغلب دلوقتى بيشتكى من ضيق الحال والمعيشة وقلة الشغل والفلوس ، الكل بيصرخ ومحدش عارف يلاحق جنون الأسعار وإرتفاع الدولار وال مش عارفين رايح بينا على فين ،
الفقر وحش مفيش كلام ولو كان رجلاً لقتلته ،
لكن المشكلة الأكبر أن الناس أتلهت فى الأسعار بشكل خلاها تنسي أن ربنا هو الرزاق ذو القوة المتين ، وتنسي ( وما من دابة فى الأرض إلا على الله رزقها )
ربنا هو ال بيرزقنا مش الوزير ولا رئيس الجمهورية . ورزق ربنا عمره ما كان مرتبط بالبورصة ولا سعر الدولار ، ربنا هو الغنى يبقي نخاف من الفقر إزاى ؟!!
ربنا هو وحده القادر على صلاح الحال وتغييره للأفضل بس لماأحنا نصلح من نفسنا ونخلى عندنا يقين بالله أنه هو بس القادر ال بيده مقاليد كل شيء ، أن الله لا يغير ما بقوم حتى يغيروا ما بأنفسهم ، ولو راجعنا حساباتنا مع نفسنا شويه وبصينا على حالنا هنلاقي نفسنا نستاهل ال إحنا فيه وأكتر !!
نسينا ربنا ونسينا ديننا قطعنا الرحم ، عقوق والدين ، سرقة مال اليتيم ، ظلم ، وقسوة وجبروت ، خيانه زوجية ملهاش حدود سواء على مواقع التواصل الإجتماعي ، أوفى الحياة ، مفيش حد راضي بحاله ، محدش بيفرح لحد ناجح ولا مبسوط ،
الحقد والحسد مل القلوب ، محسوبية ورشوة فى كل المصالح الحكومية ،
التجار ال كل دقيقه بيزودوا الأسعار من غيرضمير ولا خوف من ربنا ولا رقابه ، الشباب ال ملهوش هوية ولا مذهب ،
التليفونات ال بقت أقرب لنا من جلدنا ، وياريت بنستخدمها صح ، كل ده وغيره كتير جدا ليه ؟!

علشان بعدنا عن ربنا وسنة نبينا ونسينا أن من يتق الله يجعل له مخرجاً و يرزقه من حيث لا يحتسب ،

ونسينا كمان أن (ما كان ربك ليٌهلك القري بظلم وأهلها مصلحون )

فبمناسبة الظروف الصعبه ال إحنا فيها دى أنا حابة أقول كلمتين يمكن حضراتكم تستغربوا منهم شوية . بس دول كلمتين عن يقين والله مش تجربة ،
أتصدقوا ياجماعه .طلعوا فلوس لله حتى لو جنيه ،
الصدقة لها مفعول السحر .
أيه ده إنتى بتهزرى هو حد معاه يتصدق دلوقتى ، هى الناس لاقيه تأكل ؟!!

لا مش بهزر ولا حاجه .
نتصدق بأى شيء مهما كان قليل وملهوش لازمه فى نظرنا . نتصدق حتى برغيف عيش واحد ، نتصدق حتى بجنيه وربنا هيعوضنا والله..
مش ربنا قال (من ذا الذى يٌقرض الله قرضاً حسناً فيضاعفه له أضعافاً كثيرة )
وسيدنا رسول الله صل الله عليه وسلم قال (ما نقص مال من صدقة)
كمان الصدقة بتدفع البلاء وتسد سبعين باب إلى السوء ،

الصدقة تداوى من المرض
كما قال سيدنا محمد عليه أفضل الصلاة والسلام : (داووا مرضاكم بالصدقة فإنها تدفع عنكم الأمراض والأعراض )
أفتحوا الدولاب وأى حاجه ملهاش لازمة عندنا ومش بنستخدمها نطلعها لله ( القديم عندك جديد عند غيرك ) مش بس هدوم أى حاجه ملهاش لازمة فى البيت ، فى غيرنا محتاجها جداً ،كمان فى إقتراح أتمنى الكل ينفذه ، بلاش وإحنا رايحين نزور حد ناخد جاتوه وحاجه ساقعه وشيكولاته ، الحاجات دى ملهاش أى لازمة ومش عمليه خالص فى الظروف دى ، ممكن نبدلهم بفرخه وشوية خضار أو كيلو لحمه ، أو سكر وشاى ورز وجبنه ، نجيب مسحوق غسيل ،
المهم نجيب حاجه مفيدة وكل بيت محتجالها ،
كمان ستات البيوت ال بتقضي نص اليوم وأكتر على النت شوفي الوصفات ال ممكن توفر معاكى أى حاجه وأعمليها ، والناس ال بتعمل أكل بزيادة ويترمى حرام والله ، نعمل نص الكميه أو أقل ، وبلاش أصناف كتير ،
بلاش إفترا فى نعمة ربنا . ولو عملتى وزاد معاكى طلعي منه لحد محتاج وخدى ثواب الصدقة وإطعام الطعام ، مش عاوزه تطلعي شيليه فى الفريزر وطلعيه فى يوم تانى ، المهم نراعي نعمة ربنا .
وياريت نرحم بعض شويه
وبلاش نفتكر أن تحت القبة شيخ ونحرج بعض بأسئلة ملهاش لازمة الكل بيعانى فعلاً ، ويمكن ال باين أنه غنى ومش محتاج بيعانى أكتر منك ، لأن البيوت مدارياها الحيطان والله ،
ولازم نسأل على بعض لازم نطمن على إخواتنا وحبايبنا وجيرانا خصوصاً الناس ال عارفين أن معندهمش دخل ثابت أو دخلهم قليل ،
ونفتكر ديما كلام سيدنا محمد صل الله عليه وسلم ،
ليس منا من بات شبعان وجاره جائع وهو يعلم ،

وأخيراً أبشروا بالخير فرب الخير لا يأتى إلا بالخير
ونأخد بالأسباب كما علمنا
وهو سيرزقنا كما وعدنا
والله أسأل أن يصلح حال البلاد والعباد . وأن يرفع عنا الغلاء والبلاء والوباء وأن يرزقنا رزقاً حلالاً طيباً مباركاً فيه . وأن يولى أمورنا خيارنا ،

والسلام