أبا الزهراء حدث ولا حرج،،   نورا عواجه

أبا الزهراء حدث ولا حرج،،   نورا عواجه .

بقلم نورا عواجه

(الحاج بغدادى عواجه أبي من بعد أبي ..)

لو حبيت أكتب عن أى شخص بحبه أكيد هتبقي شهادتى مجروحة لأنى هبقي شيفاه بعين المحب..
وبالتأكيد مش كل الناس هتبقي بتحب الشخص ده بنفس الدرجة ،
إلا الحج بغدادى عواجه
أخى الأكبر وأبي من بعد أبى وليا عظيم الفخر والشرف ،

معروف إن مش كل من خلف بقي أب ولاكل ال إتحرم مبقاش ، بس أخوى الحاج بغدادى ربنا أنعم عليه بقلب حنون خلاه أب لكل الناس . أولاده وأخواته والغريب قبل القريب
أنا حابه أحكيلكم عن الحج بغدادى . من باب الأعتراف بالجميل والإمتنان لكل خير عمله معايا أنا وأخواتى
ومن باب البر بالأباء لأنه نجح فعلا أنه يحسسنا إن أبونا لسه عايش ، لما وقف معانا ومع أولادنا فى كل موقف فى حياتنا وكان نعم الأب والأخ والسند والضهر والعزوة ،

وأُشهد الله أنى عمرى أنا ولا أخواتى حسينا فى يوم من الأيام أن أبونا مات ولا حسينا باليتم أبدا ، لأنه عمره ماقصر معانا فى أى حاجه . بالعكس كان ديما ييجى على نفسه ومصلحتة وراحتة علشان يرضي الكل . فلو حبيت أكتب عن مواقفه النبيلة معايا طول حياتى محتاجه مجلدات ملهاش عدد ، وكيف لا (وهو الذى إذا طلبنا منه نجمة عاد حاملا السماء) أذن
_حدث ولاحرج عن كرم الأخلاق الامتناهى والأفعال التى لاتُحصي ولاتُعد .
_حدث ولاحرج عن بره بأمه وأبوه هم وعايشين قيراط وبعد وفاتهم ٢٤ قيراط ،
هقول لحضراتكم موقف واحد من ملايين المواقف . منها على سبيل المثال لا الحصر ،
قبل وفاة أمى الله يرحمها كان الحج بغدادى وأخى محمود الذى لايقل عنه فى البر بيستعدوا ويجهزوا أوراق الحج لأمى عليها رحمة الله
ولكن قضاء الله نفذ قبل تأدية الفريضة وتوفت أمى ،
فالحج بغدادى صمم أنه يسافر يحج عنها مهما كلفه الأمر مادياً ، وبعد مارجع بسلامة الله بعدها بفتره صمم يحج عن أبونا من باب البر وربنا ساعده وأدى الفريضة عن أبي .

_حدث ولاحرج عن صلة الرحم ال ديما حريص أنه يوصلها مهما كان القرايب بُعاد سواء من ناحية أمى أو أبوى ،
كان لى عم شقيق سافر إسكندرية من زمان جداً ومكنش حد يعرف عنه حاجه ، الحاج سأل ودور لحد ما عرف مكانه وتواصل مع أولاد عمى وزارهم وأخد زوجته وأولاده ولف عليهم بيت بيت علشان صلة الرحم تبقي موجوده ، والحمد لله علاقتنا فى تواصل جميل إلى الأن ،
_حدث ولاحرج ، عن خدمة الحجيج لبيت الله الحرام والتى أصبحت أقرب إليه من نفسه وقلبه ، وكل من سافر معه يشهد بأنه نعم الخادم والعبد المجتهد للتقرب إلى الله ،
_حدث ولاحرج ، عن بيته المفتوح آناء الليل وأطراف النهار للغريب قبل القريب ولكل من يقصده فى رأي أو مصلحه أو حل مشكله ،

_حدث ولاحرج ، عن رأيه السديد لكل من طلب المشورة فى أى أمر من أمور الدنيا لأنه الكبير قيمة وقامة وفعلا وقولاً ،
_حدث ولاحرج ، عن خدمة بلدنا وأهلها وديوان العيله والجامع وال كان أول الحريصين أنه الجامع والخيمه (ديوان العيله بنجع أحمد بك سليم) يكونوا
فى أحسن حال مقارنة بقرى ونجوع من حولنا
ولم يدخر أى جهد ولاوقت ولامال فى تحقيق ذلك والجميع يشهد على ذلك منذ سنيين ،

_حدث ولاحرج ، عن فعل الخير وال عمره ماأتكلم عنه ولاجاب سيره ابداً سواء زواج يتيمات . أوسفر مع مريض أو كسوة الفقراء فى المواسم والأعياد بصفه دائمة ، شنط رمضان ، مجالس الصلح ، عمره ماقال حرف واحد عن كل ده ، بس أحنا بنسمع من بره من كتر حب الناس ليه ،
_حدث ولاحرج عن قول كلمة الحق ولو على رقبته لأنه لا يخاف فى الله لومة لائم ،

_حدث ولاحرج ، عن الحب والحنان والخوف على كل ال حواليه بالرغم من أنه مش بيقول كلام حلو ،
بس عمره ماقدر يدارى حبه وحنانه وال بيبان فى كل تفصيله معانا ،
شهادتى فيك مجروحه ياأبي
ومهما أقول وأكتب وأوصف مش هقدر أوفيك حقك علينا كلنا ،
أنا حبيت أكرمك فى حياتك قدام كل الناس من باب البر بالوالدين لأنك كنت بار بينا زى ماكنت بار بأمنا وأبونا ،
حبيت الناس تعرف أن فى أخوات أكتر وأحن من الأباء مليون مره فلازم نعترف بجميلهم علينا ،
ونطلب من الناس يدعولهم بكل خير يستحقوه وكمان نعرفهم فى حياتهم قد أيه إحنا بنحبهم ومقدرين جميلهم وخيرهم ومعروفهم علينا ،
وأنا عاوزه كل الناس تدعيلك ياغالى بحق كل خير فى حياتنا أنت السبب فيه
وأسال الله العظيم رب العرش العظيم ، أن يمتعك بالصحة والعافية وطول العمر فى طاعه ، وأن يجعلك من سعداء الدنيا والأخره ، ويفرح قلبك بولادك وتشوف أحفادك فى حياتك ، ويجبر بخاطرك ويرضيك ويراضيك ويرضي عنك.
وأن يديم علينا نعمة وجودك ويحفظ لنا تراب رجليك .. ويديمك تاج فوق روؤسنا ياأغلى الناس ودمت لنا السند والضهر والعزوة ،
وأخيرا وليس بآخر ،
مال كل شيء ياأبي و ظلّ كتفك ثابتًا يسنِدُني لا يميل ، اللهم أبي
وقلب أبي و روح أبي ، وحنيّة أبي وإبتسامة أبي
اللهم عمراً مديداً لايخلو من أبي ..

والسلام ،