في يوم عيد الفلاح …

كلمات الشاعر

سعد الشرقاوى

 في يوم عيد الفلاح …

 

حال الرّيف

كان مالو الدهليز الواسع

ودوايرُه المفروشه بقش

والباب المكسور من وسطه

وشبّاكه المسدود بمْرش

,,

والصًّفـّة ولبنها الرّايب

فى الطاجن بيبات مكشوف

وصبيّة بتكلـّم ابوها

وعنيها مليانه كسوف

,,

كات لمبة جاز بتكفـّينا

ولا نشعر فى الضـّلمة بخوف

والفرحة بتسبق خطاوينا

لو يدخل على دارنا ضيوف

,,

كان راديو واحد فى العزبة

وصحابه كات بتعلـّيه

وبنسمع صوت الشيخ رفعت

والعالم ملمومه عليه

,,

والطبخة بتلف الحارة

وتتفرّق على كل الناس

والرّاكية بتولع زنهارة

للسهرة جنب الكبّاس

,,

وكبير يتكلم بالحكمة

وصغيّر يقعد يتعلـّم

والوافد بيبوس على ايده

ويستأذن قبل ما يتكلم

,,

والسيما بتيجي ف عزبتنا

وبتعرض على حيطة كبيرة

والفجر يصبّح على بيتنا

وعلى عيشنا المخبوز بخميرة

,,

والتوتة على شط الترعة

والموردة بتحضن فى الضّلـّه

وصبايا بتعمل حوّيا

والزير بيْنقـّط فى القلـّة

,,

والشمس بتبْعت لون دهبي

يتمخطرعلى زرع الغيط

ويصحيّ العصفور من بدري

بيغنيّ ويشبع تنطيط

,,

وشبابنا بيدرس فى الغلـّة

ويتعايق لو عاز يتجوّز

ويحدّد ويلم الشلـّة

من أوّل ما القطن يلوّز

,,

والدّار تتبيّض بالجير

وعليها بنرسم كام نخله

وستاير منقوشة حرير

لو فاضل شهرين ع الدُّخله

,,

وعروسة بنعلن خطوبتها

للقمر البايت سهران

والعزبة بتحضر بطوبتها

تتفرّج على لعْب الزّان

,,

ولا نسمع عن قتل بيحصل

ولا سرقة ولا أيْ كلام

ولا عيّل واحد كان يعرف

فى العزبة طعم البرشام

,,

ولا يقدر يفتن على جارًه

ويتمجّغ بين كاني وماني

ولا يدخل بحرام على دارُه

ولا يعرف سلفي واخواني

,,

دي الوقت آهي باظت عزبتنا

واتكسرت كل البلاليص

والغرزة اتفتحت على بيتنا

ويوماتي محاكم وبوليس

,,

وسوابق يجمع أصحابًه

للسّرقة برنـّة تليفون

والجامع فاضي وعلى بابه

دخـّان فيه ريحة أفيون

,,

والبنت اتنشرت فى الموقع

وصورتها ف ايد كل الناس

والارض آهي بارت وبانوها

والقهوة مكان الكبّاس

,,

وحمير مسلوخة وأدويّه

مسروقة وكانت فسدانه

والبنت اتفقت مع ابوها

يستولوا كمان ع الجبّانه

,,,

وما عادش لا رتعة ولا رواسة

ولا حيطة مبنيّة بطين

والكل اتكلم فى سياسة

وبيفتي في امور الدين

,,,

والعركة اتنصبت من كلمة

والنخوه آهي صبحت مسكينه

والخنفس بيوقـّف شعره

وشايليّ ف جيبه السكينة

,,,

وكبيرهم أصبح متحيّر

وصغارهم تتحكـّم فيهم

والحالة بتغلا وتتغيّر

والخير مش راضي يكفـّيهم

,,,

والتوكتوك يجري وسوّاقه

مفطوم وف حنكه البزّازه

ومشغـّل ديسكو على مزاجه

لو فايت من وسط جنازه

,,,

وصبايا بتلبس متحزّق

ح يفرتك عضم اللى جابوها

وشباب بيْبُصْ وبيْبحْلق

وكتير ع الفيس بيتابعوها

,,,

والفورن البلدي ماهش باين

ولا واحدة بتطبخ فى كانون

والعيش بيجيلها من الآلي

وبتقضيّ اليوم ع التليفون

,,,

ما تشمّش ريحة مقلاية

ولا رز معمّر فى العرصة

والحٌرمة غداها ف شوّاية

وبتـْتابع اخبار البورصة

,,,

والدنيا اتقلبت والحالة

عمّالة تسوء أوّل باوّل

وما عادش شهامة رجّالة

ولا عاد فيه ريف زيْ الاوّل

 

كلمات الشاعر

سعد الشرقاوى