بقلم … سعيده باش طبجى
《روّحتْ وانا شاعرةْ فنّانةْ》
يا بَحرْ جيتِكْْ ذابْلةْ و تعبانةْ
الدّْمعْ يهْمي والجُّفُونْ عطشانةْ
مدّيتْ لي أمْواجِكْ
اِيدِينْ مِليانينْ بالحنانةْ
وفرشْتْ لي رَمْلاتِکْ
زْرابي المْحبّةْ بالدّفا مِلْيانَةْ
واسْنَدتْ خَدّي فُوقْ زِنْدْ صْخُورِکْ
وغْفیتْ نِحلمْ بالمُنَی المِزْیانَهْ
ولْقيتْ في أحضانْ شمْسِكْ نُوري
و دْفِيتْ وانا ضايْعَةْ و بَردانَةْ
يا بَحرْ منِّكْ شِعري
وفي مُوجْتِكْ نعشَقْ جْدَايلْ شَعري
و في رَمْلتِكْ ننْسِى مْحَاينْ عُمْرِي
ونْحِسْ نشْوَةْ في عظامي تِسْري
و نْعيشْ أيّامِي والأسَى ينْسانا
وانا و انْت والسّما مااحلانا
يا بحرْ جيتِكْ نَحبي
وظهْري مْقوّسْ تحتْ حمايلْ كَربي
نِبْغي نْبُوحْ لمُوجْتِكْ بْذَنْبي
مَا عُدتْ نقْدِرْ هَا الهْمُومْ نْخَبِّي
ضاعِتْ ثْنِيتي وتاهْ مِنّي دَربِي
و حتّى عصاتي شابِتْ الحَنّانةْ
و وَردْ عُمْري ذابْلاتْ ألوانَهْ
يا بَحر نِشْكيلِكْ هْمُومي..نْدَادي
في حماكْ نِدعِي لْخَالْقي و نْنادي
و نْبُوحْ بشُوقي لْعيلْتي وأوْلادي
وخُوفي وقهْري وحَسْرتي على بْلادي
و انْت مْعايا تْضُمّني بحنانةْ
و تسْمعْ حَنيني و آهْتي الذَّبْلانةْ
يا بَحرْ جيتكْ كارهةْ و غَضْبانةْ
قْلامِي مْريضَةْ و كِلْمْتي تَعبانةْ
مَسَّحتْ علَى جْرْوحي بكَفْ أمْواجِكْ
وغْسِلْتْني بضْياكْ مِنْ عجاجِكْ
ألهَمْتني و رفّعتني لأبْراجِكْ
وفي عَرشكْ زيّنْتْ رَاسي بتاجِكْ
روَّحْتْ منِّكْ عاشْقةْ ولْْهانةْ
روَّحتْ وانا شَاعرةْ فنّانةْ ☆☆☆
《س.باش طبجي ☆تونس》
