شاعر العامية المصري كريم عيسى

مع شاعر العامية المصري كريم عيسى /
السعيد عبد العاطي مبارك الفايد – مصر ٠

بقيت بارد تشوف شكلي ..
تقول – أعصابه – تلاجه
وبادخل كل يوم رهانات ..
فـ بخسر كل يوم حاجه !٠
—

أنا نفسي أبكي
و العيون رافضة الدّموع
أنا موجوع وجع مكتوم
كُتر الهموم زي السّموم
بتنقتل ببطىء بتفقد النّطق
ما تعرفش أيه اللي وجعك
تقرب و تشتكي و لا حد سامعك
بتصرخ تنادي حبايبك في وادي
و أنت برضو في وادي
فبتموت لوحدك ٠
٠٠٠٠٠٠٠
شاعر مسكون بالشعر يتنفس شعرا يعذبه الحنين و الشوق و الحزن يعيش صراع بين الأنا و الواقع في تصادم مع الحياة هكذا
لا تمل من السماع له و قرأته كلماته تشكل ضمير المجتمع أمام المتغيرات و التقلبات التي تعصف بالثوابت الاجتماعية في نوبة تمرد و حيرة و شك و قلق يرسم موال الحلم في عتمة تطادره ليل نهار ثنائية لا مهادنة فيها ٠٠
أليس هو القائل :
لو كان بايدي انسي ..
وارجع مكان ما اخترت
– مكنتش اتأخرت .

* نبذة عنه :
كريم عيسى شاعر عامية مصري نشأ في محافظة المنوفية درس في مدرسة ثانوية السادات بمدينة تلا ٠
حاصل على بكالوريوس تربية اعلام تربوي قسم مسرح ٠
مقيم في مدينة ٦ أكتوبر ٠
اهتم بالشعر العاطفي و الغنائي والاجتماعي و السياسي و الحياة اليومية و تفاصيلها ٠

أنا المواطن محتمل
مابقتش قادر أحتمل
إن جيت في مره أبتسم
بلاقي معمولي عمل
وان جيت في مرة أشتكي
بلاقيني جوا المعتقل
حبة أمل جوا الجيوب
بتزق دقات القلوب
ويادوب بنحلم اه يادوب
ولا عمر حلم بيكتمل
انا المواطن محتمل ٠

* مختارات من شعره :
و ها هو شاعرنا كريم عيسى الذي يطوف بنا في متواليته من خلال رحلة حلم مطارد يحلم بمعانقة ظلال المكان و إثارة النفس بمشهد خيالي يحلق من فوق الأماني لمدينه الفاضلة المفقودة وسط الزحام ، كطائر جريح متعب من الدوران و ممنوع العودة ، فيقف كفيلسوف حول الحقائق المجهولة في عالمه الذي يكسوه الضباب و الغموض برغم هالة الخير و الجمال فيقول فيها :
اشتقت جدآ للأماكن والشوارع
والغُنى والتوقيتات
ومكالمة بتعدى الساعات
واشتقت إنى بجد اشوفك
مقابلة من غير ترتيبات

اشتقت جدآآ للشتا
وحضن الايدين
واشتقت لكلام العينين
ف مقابلة جت متأخرة
يا هل ترىَ ..

أخبارك ايه !
بقالك انتى كام سنة ..
مختفية ليه!
وإشمعنى انا !

ما ياماا ناس سابوا ناس
وحبوا تانى وكملوا..
اشمعنى انا ..
الفُرقة قصدت تقتلوا

تخيلي ..
فى حد يفضل كام سنة ..
مستني يمكن ترجعي !
من يوم بعادك وانا
بردو لسة هو انا
بفتح عينيا لقيت حياتى
عدّى منها كام سنة

معظم صحابى اتجوزوا ..
وشايلين عيال على كتفهم
وانا لسة ليه
مش عايز ابقى زيهم
غير بس بيكي ..

اشتقت جدآ للأماكن والشوارع
واشتقت أكتر فى الحقيقة
لـ جمال عنيكي ٠
***
و يقول في مقطوعة أخرى :
ياللي بين حضنك سعادة
حتى طعم الحب خام
انتي كاملة في كل حاجة
في السكوت أو في الكلام
انتي بيت مليان هدوء
حتي لو جواه زحام
انتي روح جوه روح
ليكي كل الاهتمام
وبعد كل الحب منك
مبقتش قادر اوصف الكلام ٠
***
و نختم له بهذه الرائعة التي يختصر فيها معادلة الحياة في شفافية مغلفة بنزعة ضبابية يرسم لوحته بين عشق الذات و الوطن و المحبوبة معاتبا تباريح العشق المترنح على قسوة الحياة فيقول فيها كريم عيسى :
النص ده مهم جدا
“أسف اني محبتكيش”
يجوز اني محبتكيش
يجوز اني في كام مره
حاولت ارضيكي لو مره
وانت ولا بترضيش

يجوز انك ماعتبتيش
بيبان قلبي ولا دخلتيش
ولا خبطتي يوم ع الباب
ولا عرفتي في يوم أسباب
عذاب قلبي ولا فهمتيش

يجوز حبي جناح مكسور
لا طار بيكي بلاد أحلام
ولا زقزق وقال ألحان
ولا وراكي ضي النور

يجوز روحي سنين غابت
قصاد قلبك كتير فاتت
ولا حست ولا شافت
ولا رضيت معاكي تعيش

يجوز اني محبتكيش
لكنك بردو منطقتيش
وكنتي راضيه بالفرقه
وقولتي عادي مش فارقه
منين عايزاني وياكي
وإنتي بعيد مقربتيش ٠

و بعد هذا العرض لشاعرية شاعرنا الشاب المصري كريم عيسى الذي لا تمل من تذوق مقطوعاته الشعرية التي تجذبك في تنوعها و مدى صدق الصورة التي لها مغزى و عمق متدفق الوجدان يختزل في مشاهد الحنين إلى عالم يعاني من غربة الجمال و السلام في أسلوب شيق و لهجة عفوية تلقائية تخاطب الضمير المضطرب في اقناع ليقدم رسالة اجتماعية هي عنوان الحياة دائما ٠
مع الوعد بلقاء متجدد لتغريدة الشعر العربي إن شاء الله ٠