مجبر ع السّكات
مجبور في خط السير رجوع
ولا كل وش يكون قناع
وبزيف حنين يكوي الضلوع
من غير دموع
ولا طول كلام مشتاق سلام
مشتاق لريحة حضنها
ولضمه اقرب لاختلاف كل الضلوع
وانا بتحضن ولصوت بـ همس يهزني
* بتحبني * ؟!
من غير كلام
انفاسي وقفت إحترام
تنهيده فـ الصََدر الكتوم
فـ لقيتني بسرد فـ الحروف هيئة نفس
بتنفسك
وفـ كل شهقه تخش صٍدري تُشقها
بًـ أتلمسك وادهن عسل
واسمع ضلوعي بتنكسر مع طقطقة
صوت الحنين
وارجع لـ خط السير أسير
مكسور حزين عايشك سكات
مجبور سكوت على ده الوجع
اهـ وبـ أكتبك شعر فـ غزل بين السطور
وبيسألك !!
بتحبني… دي حروف سؤال ؟؟؟
ولا ده وصفك للعدم
وان كان عدم
تشهد علينا ضمتك يوم اللقا
تشهد غيوم الليل فـ عينك والقمر
تشهد عليا شابٍٍتك
وانتي القدم فوق القدم وبتحضني
كان رد فعلك وقتها
نََفسين ودابوا فـ شفتي ليه بتنكري… ؟!
ازاي وريحة معصمك فوق الهدوم متثبته
بصمات ايديك على الكتاف
حوالين رقابتي مشبكه
وحياة شفايفك والايدين المرعوشين
لسه البلل على شفتي عمال يفور
لسه الاثار فوق الرمال
والموج بـ يضرب فـ الصخور
لسه الخطاوي معلمه بـ المرمغه
وزمانا اهو عمال يدور
حوالينا دايره ومفرغه
رغم المكان نفس المكان
نفسي ونفسك واللي كان
وانتٍ اللي جايه بتسألي…* بتحبني* ؟!
كلمات الشاعر
وائل رشوان
