كبرت ملامحي لكني ماكبرتش …

    بقلم الشاعر …محمود بدر

كبرت ملامحي لكني ماكبرتش 

لسه فى عنيكى طفل باتشاقىٰ 

لفيت كتير وكأني ماســافرتش 

دايمـاً لـــروحك روحي مشتاقة

مشتاق فى حضنك أسمع الحواديت 

نفسي بخـور الفــــرحة تمـلا البيت 

وتندهيلي ألاقى نفســـى جـــريت 

ضحــكة عينيـكي بقلبـي تتلاقــى  

بتزيد حمــــول الدنيا على كتفي 

أجـــــري عليكي تسندي مِيلتي 

وتردي غيبتي وتقفي فى صـفي 

عمـرك فى يوم لا تعبتي ولا ميلتي 

واخدك حبيبتي وصاحبتي وأمي 

ومشـاركة قلبي فرحتي وهمي 

ريحة دفـاكي معَشِشه فى دمـي 

ورضـــاكــــــي ُزوَّادي وضُــللتي 

مش بس بافتكرك فى يوم عــيدك 

أنا كل لحظة فى عمري فـاكـراكي 

باتوضى بـ المِسْك أما أبوس إيدك 

وبترقي وجـعي وتعبي بدُعاكــي 

بردانــه روحي تعالــي دفينـــــي 

سمــــي عليا وإمسحـي جبيني 

إزاي هاوفـَّــي نقطـــة من ديني 

وأنا حتــــة منك عايشة برضاكـي 

    بقلم الشاعر …محمود بدر