فارد جناح الحلم

فارد جناح الحلم على زحمة الكوابيس
جايز سيناريو الفيلم يكبح جماح عتريس
جامح حصان العمر مخلوط عليه الأمر
ياروح ما بعدك روح
لتروح حياتنا فطيس
على رقصة المدبوح
مهما القوافي تنوح
محبوسه قولة آه
في عتمة الكواليس
تضاريس رسمها الخوف
خضعت خلايا الشوف
يا تشوف بعين الرضا
يا تشوف جموح إبليس
محابيس في ساعة قضا
والساعة ما بتمشيش
إزاي يضيق الفضا
على قد فتحة شيش
أحاسيس حكاوي الصبا
شابت في ساعة طيش
مش باقي من جتتي
غير نبضه رافضه تعيش
قراطيس ياريت من ورق
ملاطيش غواها الغرق
يا اللي كواك الغلا
البركه في البقشيش
بقشيش يا هانم أنا
طول عمري هايم هنا
ما نابني من عشقها
غير سابقه سايقه الفيش
كيل المشاهد طفح
لا هويس فؤاده انفتح
ولا رفعوا شيء م الخوف
عن كاهل الحرافيش
قصاقيص مشاعرك شجن
درويش في عشق الوطن
منحوت على جبهتي :
( تعظيم سلام للجيش )
لكن على فطرتي
دافن بذور صرختي
في كهف ذاك الوجع
المعني بالتهميش

كلمات الشاعر
سلامه ابو النجاه