وجعوني الناس

وجعوني بجد !!
جرحوا الإحساس
بغدر … بصد
والله ده لو وسواس خناس
يعاملني بود
وماكنت في يوم
علي قلبه أهون
هل عادي يخون !!!؟؟؟

وكأن العادي إنك تتخان !!!
يخرج وجعك برّاك فتبان
مكسور الخاطر والوجدان
والغصه في صوتك شرخ .. هوان
في علاقة وثيقة مابين نفسك
ومابين أنك فعلا إنسان
و لا واحد منهم يشبه لك
حتي مرايتك … نسيت شكلك
مش راضية ملامحك فيها تبان
فتنز جروح العمر سهام
ناحيه روحك بره وجوه
برّاك مش راضي يعيش واقعك
جوّاك …. مش قابل أي ملام
فتتوه من روحك ف العتمه
وتئن بصوت مكسور غلبان
وجعوني بجد.!!!
ووجعهم باقي في أيامي
وف أحلامي
وف ليلي بسهد
مش عارفه أنام
وجعوني بجد
وجعوني …ولكن هتحمل
أنا قلبي ضعيف بس ح اكمل
مش ح أتجمل ..
وهيفضل قلبي علي عهده
مرفوع الرأس ….ولا ح اسمح إنه في يوم ينداس
والناس اللي سنين في عيوني
كانوا أغلي ألناس
لا هافكّر يوم أدعي عليهم
ولا هاناديهم
ولا هافتح أي كلام وعتاب
وآدي حال الدنيا اما بتوجع
ح تروح أحباب
و ح تيجي أصحاب
وح يفضل قلبي و كالعادة
مفتوح الباب
قدام الرايح قبل الجاي
وأنا….
أنا قررت إني اشرب شاي
وأنا باسمع ناي ..

هيومة حمزة…….